Mizo team AIFF Academy champion

Mizo pariat awmna AIFF Academy-in Mizo pahnih telna East Bengal chu 2-1 in an hneh a, I League Under 18-ah an cham­pion. Barasat Stadium-a inkhelah hian East Bengal tan Khangembam Bidyashagar Singh-a'n goal hmahruai khung mah se AIFF Academy-in Lalengmawia leh Namgyal Bhutia te hmanga chhang letin kum zawnin an champion.

Nomawi inchuhna hi Pathianni tlai dar 3:30 khan neih a ni a, AIFF Aca­demy tan Edmund Lalrindika-a'n captain armband hrengin Mizo panga dang Lalliansanga Renthlei, Lal­eng­zama Vangchhia, Zo­nunmawia, B. Lalnuntluanga leh Lal­engmawia ten inkhel bul an ṭan. Bench-ah B. Romingthanga leh Joseph Lalsanglura te an awm a, minute 66-na aṭangin Joseph hi khelmual chhungah a inlar bawk.

Red and Gold captain hi Mizo rawl­thar K. Lalchhanhima a ni a, final-a cap­tain hi Mizo ve ve an ni. East Bengal bench-ah PC Rohlupuia a ṭhu a, minute 56-naah a inlan ve bawk. I League Under 18 final-ah Mizo pakua zet an inlan a, Mizo team-in final khel pha lo mah se Mizo pariat awmna AIFF Academy hi Mizo team anga chhiar theih a ni.

AIFF Academy siphurh sutna Vaivakawn rawlthar Apuia khung hi Lunglei rawlthar Edmund-a pass a ni a, Floyd Pinto hote champion-na kawngah Mizoin tha an thawh hlawk hle. AIFF Academy hian tun season atana inpuahchah nan nikum I Day Football khel turin Mizoram-ah an rawn zin a, khami ṭuma mi leh tuna champion hi an player pahnih khat bakin an danglam lo.

AIFF Academy coach Floyd Pinto chuan, "Inkhel inhnehtawk tak a nih avangin team pahnih kha chak thei dinhmunah kan ding ve ve a. Pressure sang tak hnuaiah inkhel mah ila ka naute an talbuai duh lo a, an thawhrim rah kan seng a ni. An chunga kan beiseina ang min tihhlawhtlin sak avangin an chungah ka lawm hle a ni," tiin a player-te a fak.

Final - Thlirna Tawi
AIFF Academy 2 - 1 East Bengal
AIFF : Lalengmawia 15'; Namgyal Bhutia 42' (P)
EB : Khangembam Bidyashagar Singh 14'