Cardiff pan turin Juventus?
Zanin dar 12:15-ah Juventus-in Champions League semifinal second leg khel turin Monaco an mikhual dawn a, team pahnih intawn hmasak zawkah Italian club-in 2-0 a hnehna an chan tawh avangin final khelhna tur Cardiff khawpui pan turin Massimiliano Allegri naute dinhmun a ṭha hle - club pahnih hi mahni ram league ve vea champion tura vawi khat chiah chak mamawh tawh an ni a, an chhelo tih a chiang.
Juventus manager Allegri chuan, "Tunah hian Champions League final kan la lut lo. Mahse, ka naute dinhmun a ṭhain an rilru lam pawh a inpeih em em a, Monaco-a result ṭha tak kan neih tawh kha ngaihtuahin kan khelmualah kan khelh ṭhat lehzual ka ring a ni," tiin final luh a inbeisei thu a sawi.
Allegri beisei ang thlen tir lo tur chuan French club tan goal thun khawl Kylian Mbappe leh captain Radamel Falcao chet ṭhat a pawimawh dawn tihna a ni a, hetihrual hian striker pahnih tan Barcelona tlarhma paltlang theih loh Leonardo Bonucci, Giorgio Chiellini, Andrea Barzagli, Dani Alves leh Gianluigi Buffon-te paltlang a hautak khawp ang. Hei erawh theihnghilh loh a
ṭha - Mbappe-a'n tun season-ah goal 25 a khung tawh a, Falcao-a'n goal 28 a khung tawh bawk.
Juventus goalkeeper Buffon chuan, "Champions League nomawi chawi ngei hi ka duh ṭhin a, ka khelhpui leh fan-te puihnain chu chu kan tih theih ka ring bawk a ni," a ti a, a nomawi la chawi loh Champions League nomawi chawi ngei a duh thu a sawi.
Turin club-in an tlarhnung thiamna hmingṭhatpui mah se tlarhmaah goal 32 khung tawh Gonzalo Higuain leh goal 17 khungtu Paulo Dybala an la nei cheu a - Buffon a beisei ram thlentir turin striker pahnih hi an ṭha tawk.
Higuain hian sawiselna karah Juventus tan season khata goal khung hnem lama record thar siam turin goal 37 khungtu Felice Borel (1933/34) leh goal 35 khungtu Ferenc Hirzer (1925/26)-te chiah a khum a ngai tawh - Monaco tlarhnung tan ven bik a sual lo ang.