Nomawi nen Magpies-in season an khar
Championship-ah match hnih chauh khelh tur an nei tawh tihin Newcastle United-in Premier League an khelh tur an tichiang tawh a, an match tawp ber an khelh meuh chuan champion nichungin season an khar.
Rafael Benitez-a naute hian an mikhual Barnsley chu Pathianni tlai khan 3-0 ngawtin an sawp a, an champion theih nana kawng sialsaktu erawh Aston Villa an ni - season hmasaa Premier League club hian champion tura point thum chiah mamawh tawh Brighton & Hove Albion chu 1-1 in an inhnehtawkpui a, Magpies an champion!
Magpies tan Grealish
Pathianni tlai championship khelh a nih hmain Magpies aiin Brighton tan champion kalkawng a zau zawk - Chris Hughton-a naute hian hnehna an chang a nih chuan inkhel lehlamah Magpies-in hnehna chang pawh nise nomawi an chawi thei. Mahse, champion tura match thuma point thum chiah mamawh club hian an match hnuhnung pahniha Bristol City leh Norwich City an hneh loh ang thoin an tawlhthlu nawn - dem tur chu player-te an ni.
Minute 63-naah Villa defender Nathan Baker chu hnawhchhuah a ni a, penalty a chawi zui bawk. Glenn Murray-a'n Brighton tan penalty a khung a, Brighton tan champion kalkawng a inhawnga ngaih a ni. Mahse, minute 89-naah Jack Grealish-a'n Villa si phurh a sut a, Aston Villa aiin Ayoze Perez, Chancel Mbemba leh Dwight Gayle goal hmanga Barnsley 3-0 a hnehtu Magpies an lawm zawk.
Magpies lawmna chu
Premier League aṭangin Championship-ah Newcastle United an tla a, chhuak tura rin hlawh tak manager Benitez beisei loh takin a cham. Khawvel huap pawha coach langsar ni phak hian Magpies-ah cham chhan a nei a, a hlawh tam piah lamah a players duhzawng lakluhna tur sum pek a ni.
Liverpool boss hlui hian Andros Townsend, Moussa Sissoko leh Georginio Wijnaldum te a chan chungin player 12 ngawt lakluh nan pound maktaduai 50 a in seng a, Matt Ritchie leh Gayle chu a player lakluh langsar an ni. Benitez-a'n transfer bazar a hmang fuh a, chu chu an khelh danah a lang chhuak - Premier League an inpetkai hlimin nomawi chawi em beisei ngam tawh lo mah se league match thum chhung a zawna an chak laiin an khingpui Brighton-in a zawnin match thum chhung chak hmel an hmu tawh lo a, duhawm takin season an khar.
Benitez thukhawchang
Magpies boss Benitez chuan, "Season duhawm tak kan hman avangin kan hnathawh hi chhuang tur kan ni. Kan champion-na kawngah chhuan tur tam tak kan nei a, club dang zawng zawng aiin goal (85) kan khung hnem a, season ṭan tirah match hnih kan tlawm chungin kan tho leh bawk. Kawng dik kan zawh a, kan tih tur tak tichungin rim takin kan thawk a, tihsual nei tlem tawlh tawlhin champion zia kan chhuah a ni," a ti.
UEFA coach of the year vawi hnih ni thei manager chuan sawi chhunzawmin, "Vawiina kan match hnuhnung ber kan khelh hma hian hlim takin khelmual kan lut ang a, a aia lawmna nasa zawkin kan chhuahsan thei tih ka sawi. Chu chu tunah a thleng dik ta. Fan-te pawh lawm avangin an lungchhia tih ka hria a, season hmasaa kan match hnuhnung ber nen kha chuan a in ang lo takzet a ni," tiin Premier League aṭanga petchhuah an nih ṭum a ngai lo hle.