Spain-ah Dani Pedrosa chak ber

Pathianni tlaia tlan zawh tak Spanish Grand Prix-ah Dani Pedrosa chu pakhatna a ni. Rider championship-a hmahruaitu Valentino Rossi chu 10-na a ni thung.

Circuito de Jerez-a intlansiakah pole position aṭanga bulṭantu Pedrosa hian lap 27 chu minute 45 leh 26.827sec chhungin a tlan thleng a, he hmunah hian kum 2013 hnua hnehna a chan lehna hmasa ber niin pahnihna Marc Marquez aiin second ruk zetin a fal a ni.

Spain-a inelna kha MotoGP intlansiak vawi 3,000-na chiah a ni a, kum 31-a upa Pedrosa tan hnehna hlu tak a tling. Honda rider hian tun hnaiah beisei a phak lo a, nikum September thla a tlan San Marino hnuah hnehna a chan lehna hmasa ber a ni.

Spanish rider Pedrosa chuan, "Mahni ramah ngei hnehna chan hi chu a nuamin a hlu bik. Jerez-a intlansiak hi a nuamin a hlimawm ṭhin, tun ṭum erawh ka elpuite an ṭhat em avangin kum dang zawng aiin a hautak zawk," tiin a sawi.

Tun season intlansiak hmasa pa­hniha hnehna chang thei Maverick Vinales chu paruknaah a thleng a, Yamaha rider hian point 60 hmu tawhin championship-ah pahnihna a ni. A teammate leh hmahruaitu ni bawk Rossi chu point hnihina a phak lo - Rossi hnungah hian champion lai Marquez (58points) a awm bawk.

Spanish MotoGP Results
1 Dani Pedrosa Spa Honda
2 Marc Marquez Spa Honda
3 Jorge Lorenzo Spa Ducati
4 Johann Zarco Fra Yamaha
5 Andrea Dovizioso Ita Ducati
6 Maverick Vinales Spa Yamaha
7 Danilo Petrucci Ita Ducati
8 Jonas Folger Ger Yamaha
9 Aleix Espargaro Spa Aprilia
10 Valentino Rossi Ita Yamaha