Raptors hnehin Cleveland an tlang

NBA champion Cleveland Cavaliers chuan Eastern Conference final lut turin harsatna an tawk lo. Nimin zing playoff Game 4 inkhelah Cavs hian Toronto Raptors 109-102 in an hneh a, series 4-0 in an la.

Air Canada Centre, Toronto-a inkhelah LeBron James chuan point 35 a score bakah rebound vawi kua lain assist ṭum ruk a nei bawk. American forwad hian a team chu tun season playoff match riat an khelh tawhah hnehna a la chanpui vek a ni.

Cavaliers guard Kyrie Irving chuan, "Engtik lai mahin Toronto Raptors hmachhawn hi a awlsam ngai lo. A tir aṭanga a tawp thleng khan hna hautak kan thawk tluanchhuak zak a ni," a ti. Irving hian Game 4-ah hian point 27 a score a, heng zinga 11 chu quarter hnuhnung bera a neih niin a pawimawh hunah player ṭangkai a ni.

Raptors hian Game 2 an khelh ṭuma ke rek hliam guard Kyle Lowry an chhawr thei lo a, an player pawimawh tel loin inkhel bul an ṭan ṭha lo zawk. Cavaliers hian first half-ah point 12 zetin hma an hruai.

An match hmasa pathuma chak lo vek Raptors zawi zawin an insiamṭha a, quarter hnuhnung ber an khelh dawn chuan point nga chiahin an hniam tawh, minute 6:38 khelh tur a la awm tihah 93-92 in hma an hruai let! Mahse, hun pawimawhah Cavs tan Irving chuan three points a neih bakah free throw vawi hnih vawm lutin a team a chakpui.

Eastern Conference Final-ah chuan Cavs hian Boston Celtics emaw Washington Wizards emaw an hmachhawn ang. Celtics leh Wizards te hi series-ah 2-2 in an inhnehtawk mek a, Ningani zing dar 5:30-ah Game 5 an khel ang.

Thlirna Tawi
Game 1 : Toronto Raptors 105 - 116 Cleveland Cavaliers
Gaem 2 : Toronto Raptors 103 - 125 Cleveland Cavaliers
Game 3 : Cleveland Cavaliers 115 - 94 Toronto Raptors
Game 4 : Cleveland Cavaliers 109 - 102 Toronto Raptors
(Cleveland hian series 4-0 in an la)