Wimbledon chu Djokovic tana siam

Novak Djokovic hi Roger Federer leh Rafael Nadal te khan an chep ral mai dawn niin a lang hman a, mahse a puitlin tak tak hnuah meuh chuan tu tan maha dal theih a ni lo - tunah zet chuan Serbian star hian Grand Slam nomawi 21 teh meuh a kawl khawm ta.

Djokovic-a'n Nick Kyrgios chu darkar thum leh minute khat chhungin 4-6, 6-3, 6-4, 7-6 (7-3) in a hneh a, a vawi sarih nan Wimbeldon champion a ni; tun hnaiah a zawnin vawi li zet chu All England Club-ah hian a champion tling ta chiah bawk.

Major title lak hnem lamah Djokovic hian Federer (20 titles) a khum ta a, champion hnem ber erawh Nadal (22) a la ni thung. Player pathum hian inkhelh an la chawlhsan lo vek, an kum tam deuh tawh mah se ropui ber nih tuma inelna a la tawp dawn lo.

A hlu bik
Novak Djokovic hi mahni thu duh, dik nia a hriatah chuan midang ngaichang lem loa kal pawp mai chi a ni. Hripui leng chungchangah pawh, ama doctor lam a biak rawn hnuah invenna lak ngai a ti lem lo, tennis lamah nghawng nei dawn mah se damdawi a ei phah lem lo.

Invenna a lak loh avangin Australian Open a khel thei lo, a nomawi kawl lai a humhim thei lo. French Open khel mah se a hlawhtling lo a, tunah Wimbledon khel thei mah se, tunah chuan US Open khel thei lo dinhmunah a ding leh mek.

World number 3 Djokovic chuan, "Ka nun leh tennis zin kawngah hian Wimbledon hi a pawimawh hle, season harsa leh nun hrehawm tak ka hmanna min lak kiansaktu a ni, ka tan chuan kum dang aiin a hlu," a ti.

Novak a nghet
Djokovic leh Kyrgios te hi tun hmain an la inkhel tam lo. Wimbledon hma hian vawi hnih an inkhel tawh a, set hloh miah loin Kyrgios a chak ve ve. Pathianni zan final-ah pawh Australian tlangval bawkin set a la hmasa.

Kyrgios-a'n set hmasa la tur hian vawi sarih ngawt aces a siam, a service hmasa aṭangin 81% zet point a hmu bawk. Set hnihna aṭang erawhin Djokovic chuan a zia a chhuah ve thung a, zawi muangin inkhel a thunun.

Inkhel boruak sangah a tawnhriat neih ṭhat a chhawr ṭangkai a, a khingpui player hi thinchhia leh teirei peih lo zawk a ni tih a hrechiang. Inkhel kalphung timuangin a ngam hret hret a, a hmasa bak chu set a hloh nawn lo - chak phu zawkin hnehna a chang.

Hriatreng tur
Tennis khel thiam, theihna nei sang leh player huaisen a ni. Mahse, Nick Kyrgios hian thleng sang turin nungchang ṭha a nei lo. A boruak a san dawn deuh pawhin amah bawkin a tihniam leh mai ṭhin, a theihna enin Wimbledon final a khel hi a mak lo, a nungchang en erawh chuan a mak.

Kum 27 mi Kyrgios chuan, "Kan dinhmun ka thlirkir a, eng tiangin nge hetiang hi ka thlen mai theih tih pawh ka hre lo. Thla khat leh a chanve vel liam ta kha chuan ka ṭhian ṭhenkhatte nen basketball kan la khel mai mai," tiin a sawi.

Hripui hlau zinga mi a ni a, hri a len hnuah phei chuan world number 40 Kyrgios hi a inkhel tam lo. Tun season kal laiah pawh tournament pali chiah a la khel, season chawhnu lamah pawh eng zat nge a khelh chhunzawm theih dawn a la hriat loh.

Djokovic leh Number
July 10, Pathianni kha Novak Djokovic leh a nupui Jelena te inneih kum riatna champha a ni chiah a, a tana hun pawimawh bik niah Novak hian mellung pawimawh tak tak dang a phun belh.
4: Bjorn Borg, Pete Sampras leh Roger Federer te hnungzuiin, Open Era chinah vawi li emaw a aia tam emaw a zawna Wimbledon champion ni thei palina a ni.
7: Wimbledon title vawi sarih a la ta a, a naupan laia a mi ngaihsan Sampras leh William Renshaw te a nih rual. Vawi riat champion Federer chauh a chungah a awm.
8: Djokovic tan Wimbledon final vawi riatna a ni, ani aia Wimbledon final khel hnem chu Federer niin vawi 12 a khel tawh thung.
9: Kum 30 a tlin hnuah Djokovic-a'n Grand Slam final vawi kua a lut tawh a, a chak fai vek. Centre Court bikah chuan Andy Murray a hneh loh aṭangin kum kua zet a liam leh ta, a chak lohna match dang chu Court Number 1-ah a khelh ṭumin a ni.
21: Grand Slam nomawi 21 a chawi tling ta chiah. Federer aiin nomawi pakhatin a nei hnem a, title pakhatin Rafael Nadal a la phak rih lo thung.
28: All England Club-a match a khelh hnuhnung 28 zetah hnehna a chang fai vek.
32: Grand Slam final vawi 32 a khel tling ta chiah a, mipa player zingah chuan final khel hnem ber a ni. Hmeichhe player zingah chuan vawi 34 kheltu Chris Evert leh Serena Williams (33) ten an khel hnem.
35: Kum 35 leh ni 49 mi a ni a, Open Era chinah chuan Wimbledon champion thei upa ber dawt a ni. 2017 khan Federer-a'n kum 36 a tlin dawn hnaiah nomawi hi a lo chawi tawh.