Zaninah MSL 7 Finals Game 1 Zarkawt BCA vs Khatla TBL

Tualchhung basketball inelna lian leh ropui ber - Mizoram Super League season 7 chu zanin hian finals game 1 khelh a ni dawn. Champion lai Zarkawt BCA leh vawi hnih champion tawh Khatla TBL te an inhmachhawn ang.

Mizoram Basketball Association (MBBA) chuan R. Dengṭhuama Indoor Stadium-a inkhel en turin mipui an sawm, zan dar 8:30 a inkhel tur hi a hmuna en duh tan ticket Rs 50 leh Rs 100 man a ni. Zonet chuan live-in an ti chhuak dawn bawk.

MSL finals hi best of seven series hmanga khelh a ni dawn. Champion tur chuan vawi khat chauh chak a tawk lo, a tlem berah vawi hnih tal chak a ngai tihna a ni. July 14, Ningani zanah game 2 an khelh leh ang.

BCA an ṭha
Lalrina Renthlei chauh pawh thlamuanpui tham a ni a, vawi thum champion tawh hian Matthew Remtluanga Sailo leh Zonunsanga te an la nei kawp bawk. Tualchhung player ṭha pathum ti chak zual turin Joseph Fredrick Allen an nei bawk.

Lalruatfela (Afela) enkawl team hian MSL league round an thunun hneh viau, a chung beraah an awm. Tun season MSL bikah TBL nen vawi thum an inkhel tawh a, vawi hnih an chak, an chak loh ṭuma an hniam zawkna pawh point khat chauh a ni.

Team ṭha leh rinkai an nih avangin inthlahdah ngawt erawh a remchang dawn lo. League round an intawn hnuhnung zawkah an ngam loh zeuh avangin hneh chiang sa tia sawi pawh a remchang lo, chetsual theih a nih avangin an fimkhur ang.

TBL beiseina
Khatla TBL coach Vanlalnunsanga'n BCA chu team ṭha an nih thu a sawi tawh a, chutih rualin hneh theih loh an nih bik loh thu Vanglaini a lo hrilh tawh, a thusawi ti dik turin a lo hneh tawh ngei bawk, zainah pawh dawih zawk an ni dawn lo.

MSL hmasa pahnih champion TBL tan Levi Bradley Jr. a pawimawh dawn, ani hian point neih hnem bakah ṭhiante siamsak nuam a ti ṭhin. 6ft 8in a sang American player thlawp tur hian tualchhung player lamin thapui an thawh ve thung a ngai ang.

TBL hian MSL tir lam an thunun a, mahse an ropuina kha BCA lakah an hloh mek. Kuminah hian an champion leh a nih chuan Zarkawt team nomawi chawi zat an umphak leh dawn, team ṭha pahnihin ropui zawk nih an inchuh dawn avangin inkhel a hmuhnawm leh khawp ang.

MSL 7 Finals
July 12, Thawhlehni
Game 1: Zarkawt BCA 08:30 PM Khatla TBL
July 14, Ningani
Game 2: Khatla TBL 08:30 PM Zarkawt BCA
July 16, Inrinni
Game 3: Zarkawt BCA 08:30 PM Khatla TBL