Juventus-ah Paul Pogba a kir ta

Manchester United chhuahsantu Paul Pogba chuan club thar a nei ta a, United a zawm hmaa a khelhna Juve-ah bawk a kir - Old Trafford-a a contract a hman zawh tawh avangin Italian club hi free transfer-in a zawm.

Kum 29 mi midfielder hian Juventus tana kum li chhung khel turin contract hi a ziak a, Zirtawpni khan Turin khawpui chu medical nei turin a thleng a, Juve hian nimin khan an lakluh thu an puang zui - kar khatah £160,000 vel a hlawh dawn niin an sawi a, United-a a kar khat hlawh £290,000 nen a inthlau hle.

Juventus chuan, "Zinkawng ngaihnawm tak zawh ho a, kan inthlah hnuah khan engtikah emaw chuan kan intawn leh ngei beiseina kan nei tlat ṭhin a ni," an ti a, an player hlui kha lawm takin an lo pawm leh ta.

Fapa tlanbo?
Kum 29 mi Pogba hian Manchester United aṭangin a professional career zinkawng a ṭan a, kum 2009 khan kum 16 mi lek niin United academy chu Le Havre aṭangin a pan. Mahse, senior team tan match sarih chiah a khel hman tihin Juve lam a pan a, Italian club-ah hian a hming a chher.

Juve tan hian match 177 khel hmanin goal 34 a khung a, assist vawi 40 a nei. Season li a khelh chhungin Serie A nomawi a chawi vek a, Coppa Italia (2) leh Supercoppa Italiana (2) nomawi a chawipui bawk.

Mahse, kum 2016 khan Old Trafford-ah a kir a, pound maktaduai 89 man niin, a hunlaia khawvel footballer man to ber a ni. Mahse, Red Devils tan Europa League (1) leh League Cup (1) ah chiah champion nomawi a chawi a, amah laluttu coach Jose Mourinho nen an inhmu thiam lo a, vice captain a nihna a chân hial.

Hnawl hnu...
Pogba hian 2018-19 season khan United tan goal 16 ngawt a khung a, a hming a chher hle. Mahse, a hnu season thumah match 91 aṭangin goal riat a khung hram a, a match hnuhnung 27 aṭangin vawi khat chiah a khung.

United tan match 226 khelin goal 39 a khung a, tun hnaia Manchester khaw club talbuai chhanah fans tam takin an puh a, April-a Norwich City an mikhual ṭumin fan-ten an au el hial - Old Trafford-a inlan hnuhnung ber a ni.

World Cup 2018-a France an champion theih nana player pawimawh hi fans zingah tla tlum lo mah se United-in contract thar erawh ziahpui an tum a, an beisei anga an inrem theih loh hnuin an chhuahtir ta.

Ka lo haw
United leh Pogba inrem thei lo hi Juve lawmah a lo tla a, Italian club hian French midfielder hi fapa tlanbo ang maiin an lo lawm a, hmanni lawka £89mtd-a an hralh kha a thlawnin an la let leh ta.

Juve chuan, "Kum naupang takin min chhuahsan a, tunah chuan mi puitling tak leh champion angin kan hnenah a lo kir leh ta. Thil inthlak danglam lo pakhat erawh a awm a, club thawnthu nghilh ngai loh tur ziak thar leh turin kan phur hle.

"Pogba a lo kir a, hei ai hian a hlim theih chuang loh," an ti - United-in to taka an lei kha a thlawn bawkin a vawi hnih nan an chhuahtir leh ta a, an inchhir dawn leh dawn loh chu hunin a hril ang.