Haaland-a'n United tum a châk

Manchester City chuan Pathianni khan an player thar Erling Haaland an tlangzarh a, Norwegian striker hian City hmelma kumhlun Manchester United hmachhawn a châk thu a sawi nghal!

Haaland chuan City player anga a hmachhawn châk an zawhna chu chhangletin, "Sawi ka duh lo a, mahse, Manchester United hmachhawn ka châk," tiin a sawi.

Kum 21 mi Haaland hi City a zawm hma khan Manchester United nen pawh sawizawm a ni a, mahse, Borussia Dortmund striker hlui hian a pa Alfie Haaland khelh ṭhinna City a thlang.

Haaland chuan City a thlan chhan sawifiahin, "TV lamah chuan City inkhel ka lo en tawh ṭhin a, a taka tawn erawh chuan a danglam hle. Minute 25 zet chu ball tawk loin ka awm reng a, 'Ilkay Gundogan, khawngaihin 'tiki taka' khel reng suh u,' tih mai kha ka duh a ni," a ti!

Dortmund tan match 89 a khelha goal 86 khung thei Haaland chuan sawi zawmin, "City khelh dan kha chu level dang daih a ni. An game thlir dan, khelh dan leh chance insiam dante kha a dang a, an zinga telve kha ka châk a ni.

"A tawpah chuan City chiahin ka thinlung an luah a, an khelh dan leh thil dang zawng zawng khan min hneh tlat a ni," a ti a, City nen an inkhelh zawhah club dang a ngaihtuah loh thu a sawi.

Haaland hi a kum la nau viau mah se City-ah pawh hmun pawimawh a chang nghal ang tih a chiang a, a professional club career-ah match 200 khelin goal 155 a khung der tawh.

Norway tan vawi 21 inlana goal 20 khungtu striker chuan, "Striker ka nih angin nuam ti taka inkhelh hi ka duh chu a ni mai. Nuam ka tih chuan goal ka khung ṭhin a, hlim takin ka nui thei ṭhin. Inkhelh hi nuam ka ti a, a tawpah chuan hlim taka nuih hi ka beisei chu a ni.

"Ka tan chuan chona thar a ni a, ram, league, coach leh thil dang dangte hi a thar vek a ni. Mahse, club thar zawm awmzia hi chu ka hre tawh a, phur takin kan hma hun ka thlir a ni," a ti - City-ah hian jersey number 9 a ha dawn.

Austrian club Red Bull Salzburg aṭanga hriat hlawh Haaland-a goal khung theihzia inhrilh nawn a ngai tawh lo - Premier League fans tam zawkin a inkhel hmuh an châk tawh.

City hian USA-ah pre-season tour an nei dawn a, July 21, zing dar 6:00-ah Club America nen pre-season a an match hmasa ber an khel ang.