Max tlan pelin Leclerc a chak
Charles Leclerc chuan Formula 1 champion nih a tum ngam tih a lantir thei leh ta. Ferrari driver hian champion lai Max Verstappen chu ṭum thum ngawt a tlan pel a, an inum tawn zak zak hnuah Leclerc a ding chang.
F1 season kal laiah Leclerc hi vawi thum a chakna a ni a, April thla a tlan Australian Grand Prix hnua a chak lehna hmasa ber a ni thung. Season chanve an hman chinah Max leh Leclerc ten champion nomawi an inchuh na hle.
Championship table-ah Leclerc hian point 170 a hmu ta a, pahnihnaah awmin hmahruaitu Verstappen chuan point 208 a hmu thung. An inkarah point 38 a awm, season chawhnu lam an la hman dawn avangin in lehpelhna hun a la tam.
Ferrari an chak
Season bul an ṭan fuh a, tun hnaiah erawh thutlukna siam sual leh khawl lam chiang lo vangin an che ṭha tawk lo. Pathianni zana Red Bull Ring-a intlansiakah erawh Ferrari chuan an nihna tak an lantir thei leh ta.
Leclerc-a'n a tir aṭangin na takin Vers-tappen a um, vawi 10 an tlan kual hnu chuan a vawi khat nan a tlanpel. A hnu lawkah Red Bull driver hi pit lane-ah a lut a, thapui rawn thawh zuiin tlan ṭha viau mah se, ani aiin Leclerc a tlan ṭha miau avangin a tan thil a awlsam vek bik lo.
Ferrari driver Leclerc chuan, "Intlansiak hnuhnung panga kha kei leh kan team tan a awlsam lo, tunah chuan kan hun a thleng ve leh ta. A nihna takah chuan hma ka hruai hnuah pawh khan ka hlauthawng reng, a awlsam lo ve hle a ni," tiin a sawi.
Max leh Lewis
Chak zo lo mah se Verstappen tan pahnihna nih hi a chhe lo, a nomawi humhim turin a dinhmun a la sawhnghet zel. Vawi sarih champion tawh Lewis Hamilton tan erawh champion a harsa tual tual dawn, championship table-ah pawh parukna a la ni.
Red Bull driver Verstappen chuan, "Beiseina sang tak nen fans an rawn kal khawm a, an tana hnehna ka chang thei lo erawh a pawi ka ti. Chutih rualin chak vek theih a ni lo, tun ṭum atan chuan pahnihna nih hi a ṭha viau," tiin a sawi.
Britain tlangval Hamilton-a'n kuminah chak ni hmel a la hmu miah lo, tun hnaiah erawh podium a lawn phak zeuh zeuh. Amah ang bawka Mercedes car khalhtu George Russell ten chak ni hmel hmu tur chuan intlansiak dang an nghah leh rih a ngai dawn.