Klopp-a'n midfielder a mamawh lo

Liverpool boss Jurgen Klopp chuan midfield-a player thar an lak loh vanga sawiselna a chhang let a, midfielder an mamawh loh thu a sawi.

Klopp chuan, "Mipui ngaihdan hi ka hrethiam lo. Midfielder kan lak loh chungchanga sawi awm hi mi ṭhenkhat pawhin min lo hrilh a, midfielder kan mamawhna ka hre lo," a ti.

Liverpool hian nipui transfer-ah forward Darwin Nunez leh Fábio Carvalho bakah right back Calvin Ramsay an lalut tawh a, hetihlai hian player langsar zingah Sadio Mané, Divock Origi, Takumi Minamino leh Neco Williams te an chhuahtir tawh thung.

Klopp chuan, "Midfielder lei belh tumna kan nei lo a, ka midfielder zingah chhuah min dil an la awm rih lo. Chhuah duh an awm a, min dil a nih erawh chuan anmahni thlakna tur kan zawng ang.

"Chutiang a nih loh chuan midfielder lei kher hi enge a ṭulna? Fabinho, Jordan Henderson, Thiago Alcantara, James Milner, Naby Keita, Curtis Jones, Harvey Elliott, Fabio Carvalho leh Alex Oxlade-Chamberlain kan nei a, eng ang midfielder chiah nge kan mamawh min hrilh thei em?" a ti a, midfield-ah player an nei ṭha tawk tih a sawi.

Reds hi Borussia Dortmund midfielder Jude Bellingham nen sawizawm mek an ni a, mahse, pound maktaduai 100 man bawr vel ni tura ngaih midfielder hi Klopp-a'n lakluh a tum rih lo.

Bellingham duhtu Klopp chuan, "Zawrh lai a ni lo a, chu chu kan buaina hmasa ber a ni - amaha thil buaithlak awmchhun ti pawhin a sawi theih hial ang," a ti.

English midfielder Bellingham hian tun nipuiah Anfield pan dawn lo mah se, Liverpool hian season tharah lakluh ngei tumin an bei dawn nia sawi a ni.

Liverpool hian zanin dar 6:30-ah Manchester United nen friendly match an khel dawn a, Klopp chuan, "United hmachhawn tur kan nih avangin inkhel kan ngai pawimawh a, keini chuan friendly-ah kan ngai lo," tiin chak an tum thu a sawi.

Erik ten Hag hnuaia an match hmasa ber khel tur United leh Liverpool inkhel hi Sony Liv app-ah online-in a en theih dawn a, LFCTV GO-ah a en theih bawk ang.