National Junior Football Championships for BC Roy Trophy A vawi thum nan Mizoram champion

National Junior Football Championships for BC Roy Trophy final-ah Mizoram-in Punjab an hneh a, a lungthu kim nan an champion. Mizoram hian 2013, 2019 leh 2020-ah nomawi an chawi a, Punjab lakah an 'chungnunna' an lantir bawk.

Kumin BC Roy Trophy hi Shillong-ah khelh a ni a, nimin final hmuhnawm takah Mizoram leh Punjab hun pangngaiah 1-1 in an inhnehtawk. Penalty shootout hmanga chak zawk zawn niin Mizoram 5-4 in an vannei.

Punjab-in final thleng turin goal an chhuah lo a, Mizoram tan goal khung a harsa dawn tih a hriat theih nghal. Champion lai hian ball an chang tam a, inkhel thunun tel bawk mah se Punjab keeper Harpreet Singh tan hna an siam thei meuh lo.

Dakar chanve hnuah Mizoramin inkhel an thunun rah an seng a, minute 32-naah Lalawmpuia Sailo cross chu Malsawmtluanga'n a tauh goal. Vanlalpeka Ralte hote dinhmun a ṭha a, hnehna chang turin goal venhim a tawk.

Second half tirah team ṭha zawk Mizoram an inthlahdah hret a, holam taka ball hloh an ngah avangin Punjab-in counter attack hmangin an nawr phah. Minute 49-naah Mizoram keeper H. Lalrinzuala a chesual a, hla tak aṭanga Punjab freekick pet man theih chu a nam per avangin substitute Tania Raji-a'n siphurh a sut.

Mizoramin ball chang zel mah se Punjab tlarhnung a khawng ṭha a, minute 90 chhungin goal a luh belh lo. Extra time-ah Mizoramin Lalrintluanga (Tutu-a) hmangin goal khungah an inngai a, offside vangin pawm a ni lo - penalty hmanga chak zawk zawn a ṭu phah.

Punjab-in 2016-a BC Roy Trophy an thlen ṭumin Mizoram nen final-ah hun pangngaiah 1-1 in an inhnehtawk a, penalty shootout-ah 4-2 in an chak. Tun ṭumah erawh Hoshiarpur ni tawh loin Shillong a ni tawh a, Mizoramin ṭantu an ngah zawk.

Punjab-in an pet hmasa a, hun pangngaia 'hero' Tania Raji-a'n a vawi hnihnaah chiang zetin a pet over. Mizoram tana pettu Lalpekhlua Jongte, Malsawmtluanga, Gratus Lalhnehliana, C. Zohmingsanga leh Lalawmpuia Sailo ten an pet goal vek a, 5-4 in an chak.

MFA kan lawm takzet. A chhan chu he team hi an special a, MFA hnuaia District FA pariatah player zawngin trial kan nei, a ṭha sâ la mai loin kil tinah player kan zawng. Chu chu India ram champion an ni thei hi kan lawmna tizualtu a ni.

MFA Grassroots and Youth Development Committee lama scout te kan fak a, coaching staff thawkrim tak tak kan fak a, players kan fak tawp thei lo a, a bul berah Pathian malsawmna a ni e.

Player leh coaching staff te kan inlungrual a, thlawptu kan nei ṭha bawk. MSU Shillong leh Group YMA ten min ṭawiawm ṭha a, an chungah kan lawm hle. Player chhungte zawng zawng chungah lawmthu kan sawi a, an fate inkhelhna hun an pe phal hi kan lawm. MFA hruaituten min ṭawiawm ṭha a, a hmuna kan inkhel an rawn en hian inringtawkna min pe hle. Kan thlenna hmun hi Roman Catholic Pastoral Centre a ni a, Father-te'n min ṭawngṭaipui ṭhin. Lawmthu sawi sen loh kan nei a, Pathian hruaina zar liau liau a ni.