Quarterfinal kan nghak chhuak ta Hnahthial Jt VC Vs Lengpui VC
LBS Suzuki All Mizoram Inter Village Football Tournament 2022-ah team 204 aṭangin team pariat chauh an dam tawh a, tualchhung football inelna ngaihven hlawh hi Lammualah chauh khelh a ni tawh dawn. Chhun dar 12:30-ah Aizawl khaw pawn team ṭha pahnih Hnahthial Jt. VC leh Lengpui VC te an inkhel ang a, chawhnu dar 3:30-ah Republic Veng LC leh Champhai Kanan VC te an inkhel chhunzawm ang.
Penalty mamawh lo
Hnahthial Jt VC-in quarterfinal thleng turin penalty shootout an mamawh lo a, hun pangngaiah an khingpui an la hneh vek. Coach P. Lalnunzira hote hian inelna ṭantirh lamah harsatna an tawk lo a, match hmasa berah Bungkawn Vengthar an sawp.
Saichal an inlan loh avangin walkover-in Hnahthial an chak leh a, third round-ah Darlawng 10-1 in an sawp. Fourth round-ah pawh Hnahthialin Tanhril 3-0 in an hneh. Match hnuhnung bera Khawzawl Vengthar an hneh ṭumah erawh vanneihna an mamawh thung a, 1-0 in hun rei zawk an hnufual hnuah 2-1 in an lehthal.
Hnahthial Jt VC-in position tinah player ṭha an nei a, inelna ṭan hma hauha champion rinkai an ni pha hrim hrim. Match li an khelh aṭangin goal 26 an khung a, goal li chauh an chhuah.
Lengpui an ṭha
Lengpuiin team ṭha Kawnpui VC III aṭanga bul an ṭan chungin 3-0 in hnehna an chang. Match hnihnaah Sesawng VC II chu 12-0 in an sawp leh bawk.
Mahse, Lengpui hian match hnuhnung pathumah goal an khung tam tawk lo. Zanlawn leh Sihphir Venghlun te 2-0 ve vea an hneh hnuah penalty shootout hmangin Seling an hneh.
Lengpui hi an match hnuhnung ber khelh dan aṭanga teh chi an ni lo a, Hnahthial ang thoin inelna ṭan hma aṭanga champion rinkai zinga tel pha an ni.
Hnahthial an chungnung
Hnahthial leh Lengpui hi tun hnai kum 10 chhungin ṭum hnih an inhmachhawn tawh a, Red Ribbon Football 2012 leh CYMA Football 2019-ah Hnahthial hi penalty shootout hmangin an chak ve ve.
MLA Constituency inelna Wai Wai Cup 2007 chhiar tel chuan Hnahthial hian ṭum thum an hneh tawh a, he inelnaah hian Hnahthial hi an champion. Tun ṭum inelnaah pawh hian Hnahthial hi an inringtawk hle.
Lengpui coach Rohmingthanga erawhin, "Hun pangngaiah chak zawk an awm lo. Kan inhnehtawk," tiin an inkhelh tawhna hnuhnung chungchang Vanglaini a hrilh.
En châkawm chu
Hnahthial hian game cheimawi turin midfield-ah Joseph Vanlalhruaia leh K. Lalrinfela te an kawl a, goal nawr turin Jacob Vanlalhlimpuia leh Lalrintluanga te an awm bawk. Position tinah player an nei ṭha.
Lengpui pawhin belhchian an dawl. F. Lalremsanga leh Lalrokima te ringawt hi Hnahthial tlarhnung tan invenna tham a tling dawn a, midfield-ah Joe Zoherliana a pawimawh a, tlarhnungah tawnhriat nei ṭha Lalchhuanmawia Fanai-in (Chhuantea) a ho thei bawk.
Engtin zel?
Hnahthial DFA secretary leh tun ṭuma assistant coach C. Lalramdinsanga (RD-a) chuan, "Kan squad a chhah ṭha a, tawnhriat nei leh naupang a inpawlh ṭha hle. Chutihrualin khawi team mah hi kan zuam lo a, hlauh pawh kan nei chuang lo. A bul aṭanga a tawp thlenga fight hi kan tum a ni tawp. Kan dam kim a, full strength-in kan thawkchhuak thei dawn. Lengpui hian ka hriat chinah min hneh ka la hre lo a, mahse chu chu inchhuanna chi a ni lo. Kan naute theihna ka enin 'champion mentality' kan neih hun hun kan champion hun ni tawhin ka hria," tiin an a naute a rintawk thu Vanglaini a hrilh.
Lengpui coach Rohmingthanga chuan, "Seling lakah khan chak lo thei kan ni a, chak kan phuna chen awm bawk mah se kan vannei takzetin ka hria. Football-ah chuan eng result pawh thleng thei a ni a, huaisen takin kan khel ang," tiin Vanglaini a hrilh ve bawk.