Thenzawl West zinkawng a tawp AVS an chak nuamsa

LBS Suzuki All Mizoram Inter Village Football Tournament 2022-ah Thenzawl West zinkawng ngaihnawm chu Ramhlun North-in an tihtawpsak. Nimin tlai inkhel hmuhnawm takah Ramhlun North hian 3-1 in an lehthal a, K. Lalrosanga'n goal pawimawh pahnih a khung hnuah PC Lalhruaisanga'n chak nemnghehna goal a khung.

Inkhel dangah Armed Veng South-in an ṭhenawm Armed Veng hnehtu Bungkawn chu 6-0 in an sawp. Quarterfinal-ah AVS leh Ramhlun North te hi an inhmachhawn ang.

Thenzawl West-in team ṭha bika sawi Durtlang an hneh hnuin College Veng, Saron Veng leh Tuithiang te an hneh a, Ramhlun North lakah pawh bul an ṭan ṭha. Lalhmingliana Kawlni hmangin second 30-na vel lekah an khung nghal.

Mahse, Ramhlun North-in halftime an hmang ṭha. K.Lalrosanga hmangin minute 56-naah siphurh an sut ṭhen a, Thenzawl defender pawimawh Lalrinmawia chu minute 63-naah hnawhchhuah a ni leh bawk. Thenzawl West-in player pakhata tlem zawk chungin theihtawp chhuah mah se an ṭang tluan thei ta lo, K.Lalrosanga'n minute 81-naah chakna goal khungin PC Lalhruaisanga'n injury time-ah kawh zetin a khung belh.

Armed Veng South-in champion tura rinkai an nih chhan khelmualah an pholang. FC Goa defender Lalhmangaihsanga (Papuia) freekick hmanga bul ṭanin a khat mawi tawkin an khung zui. Lalnunsanga'n (Tata) goal hnih a khung belh bakah Lalrammuanpuia, Laldinpuia Chawngthu leh R. Laldinliana ten goal khat ṭheuh an khung.

Last 16 - July 11, Thawhṭanni
Lammual
Armed Veng South LC 6 - 0 Bungkawn LC
AVS : Lalhmangaihsanga 11'; Lalrammuanpuia 14'; Lalnunsanga 20', 65'; Laldinpuia Chawngthu 28'; R Laldinliana 79'

Ramhlun North LC 3 - 1 Thenzawl West VC
RAN : K. Lalrosanga 56', 81'; PC Lalhruaisanga 90+3'
THW : Lalhmingliana Kawlni 1'