Inkhel hmuhnawm tur Champhai Kanan Vs Republic Veng
Lammualah inkhel entu an ṭhahnem dawn. A chhan chu vawiin tlai dar 3:30-ah hian football thiam veng Republic Veng leh Aizawl khaw pawn team ṭha Champhai Kanan te an inkhel dawn miau alawm.
Republic Veng leh Champhai Kanan te hian last 16-ah attacking football an khel a, an khingpuite lakah inkhel thunun ve ve mah se chak turin penalty shootout an mamawh ve ve. Quarterfinal-ah attacking football an khel nawn ngam ve ve a nih chuan football hmuhnawmna phochhuahin a awm ang.
Valpuia telna
Republic Vengin Mizoram striker tawnhriat nei ṭha zinga mi F. Lalrinpuia an kawl a, Valpuia hi upa deuh tawh mah se hun pawimawhah a theihna a lang leh ṭhin.
Republic Vengin tun hun an thlen theih nan Valpuia hian Zemabawk an hneh ṭumin goal pawimawh a khung a, ani bakah hian captain K. Lalnunzama a pawimawh bawk.
Valtea hi NECS Cup 2019 best player a ni a, midfield-ah team hotu a la ni. Tawnhriat nei ṭha Valpuia leh Valtea te hian player naupang zawkte an ho khawm a, passing game ṭha tak an lantir.
Tun ṭum inelnaah hian Republic Veng hian goal 31 khung tawhin, goal khat chiah la chhuah mah se ṭum hnih ngawt penalty shootout hmangin an chak tawh a ni.
KimKima telna
Mizo defender ṭha Lal-chhawnkima (KimKima) captain-na hnuaiah Champhai Kananin team ṭha an ni tih an pholang a, Champhai Inter Village Football-a an hneh loh Melbuk lakah pawh phuba an la.
Champhai Kanan hian mifield luah lum turin MFA Cup best player Lalramsanga an kawl a, mual sir aṭangin R. Ramdinthara goal bawh a na hle. Tharpuia hian tun inelnaah goal kua a khung tawh a, player hmuhnawm bik a ni.
Champhai Kanan hian Aizawl team ṭha Electric Veng, Chhinga Veng leh Bethlehem Vengthlang hnehtu Vaivakawn an hneh a, Republic Veng lakah pawh inrintawkna sang tak an nei ang.
Champhai an ṭha tawk
Champhai Kanan manager Lalchhandama chuan, "Champhai Kanan VC Team te inbuatsaihna leh thawhhona a ṭha tawk. Republic LC Team hneh turin position tinah player-te kan ringtawk hle. Coaching staff leh player-te theihna piah lamah kan chakna thahrui ber chu ṭawngṭaina a ni a, champion nomawiin Champhai Kanan veng a thlen ngei theih nan Lalpa chakna ringin kan hmanrua neih zawng zawng nen kan bei zel dawn a ni," tiin Vanglaini a hrilh.
Lalchhandama chuan sawi chhunzawmin, "Aizawla awm Champhai tui liak zawng zawngte an theihna zawng zawng nena min rawn ṭawiawm turin kan sawm a. Mamawh ang min petu bialtu minister TJ Lalnuntluanga leh engkima min buaipuitu Electric Veng YMA leh khawtlang mipuite chungah kan lawm hle," tiin a sawi.
An sen dawn
Republic Veng assistant coach T. Lalthantluanga (TTwoa) chuan, "Kan team hi kan inlungrual em em a, player naupang zawkte thiam taka kilkawitu Valtea leh Valpuia te an fakawm ṭhin hle. Republic Veng LC-in min duat a, khawtlangin min ṭawiawm ṭha hle. Pathian khawngaihna zarah tun hun hi kan thleng a, a aia sang thleng turin theihtawp kan chhuah ang," tiin Vanglaini a hrilh.
Republic Vengin jersey sen an ha dawn a, Lammual a sen dawn. Inter Village Football 2004 leh CYMA Football 2005 champion hian Lengpuiah pawh ṭawiawmtu an nei ṭha a, Lammualah ṭawiawmtu an nei ṭha lehzual ang. Champhai Kanan ṭantute erawhin kawr var emaw a pawl dal (sky blue) emaw an ha thung ang.