Zaninah Bye Bye tak tak? Tuikual South-in Phengphehlep hla sa tur mamawh

Mission Veng Vikings-in season liam ta Mizoram Super League aṭanga anmahni bye bye-tu Tuikual South hnawhchhuah theih chu champion tluk zeta an châk a ni. Zanin hi Vikings tan phuba lakna hun a ni a, dar 8:00 hian R. Dengṭhuama Indoor Stadium, Mualpuiah Tuikual South nen an inhmachhawn ang.

April 5, Zirtawpni zan khan Game 1-ah Vikings hian 89-59 in hnehna an chang. Mission Veng hian hnehna an chang leh thei a nih chuan season hmasa lama an ngam loh TKS 'Bye Bye' chung ngeiin final an lut dawn a ni.

Mipui an pawimawh
Inelna neihna tur hmun R. Dengṭhuama Indoor Sta­dium a lian ṭha em em a, cham­pion tum Mission Veng tan anmahni chan lam hnawh khah zawh loh a zahthlak ang bawkin Tuikual South tan an puala zuah ṭhutna hnawh khah zawh loh chu chak châk tawk lohnaah ngaih theih bawk.

MSL3 bikah Tuikual hian league round-ah pawh Mission Veng hi an ngam tawh lo a, semifinal game hmasa berah an ngam lo zui bawk. TSK hian season hmasa anga final khel zui leh tur chuan fans puihna an mamawh. Zanin hian stadium chhungah "Phengphehlep ṭial mawi te, Tuikual an hrut del del..." tia zai thawm a ring dawn.

Kan hneh thei - KC-a
Game 1-ah point 30 zetin chak lo mah se Tuikual South coach KC Lalliantluanga a buai phah lo, Armed Veng South pa chuan kum hmasa lam angin hnehna an chan leh theih a beisei thu a sawi.

KC-a chuan, "Nikum khan rinkai kan ni lo, mah se huaisen taka kan khelh avangin hnehna kan chang. Tualchhung player ṭha an inlar theih tawh ka beisei a, hlauh nei loin kan khel ang," tiin Vanglaini a hrilh. TKS hian beisei an la nei tih a chiang a, Vikings tan zuam sual theih tur an la ni.

Season hmasa khan TKS lamin Game 1-ah hnehna an chang a, Game 2-ah Vikings-in Dishant V Shah-a point 32 score hmangin hnehna an chang let. Hemi ṭum hian hun tawp nan minute 5 leh second 40 chiah a awm tawh tihin feet ruk leh inches riata sang Dishant V-a'n chiang takin a 'dunk' a, Mission Veng Vikings ṭantute ding chungin an aw rawl tawpin an au a, Game 3 khelh a ngaih phah.

Kuminah Vikings hian Ronald March an nei leh tawh, American player hian TKS a ngam hle. League round-a Tuikual a hmachhawn hmasak berah point 44 a score nghal a, a vawi hnihnaah double double a nei zui leh bawk.

Phengphehlep coach KC-a chuan, "Team ṭanrualna pawi­mawh zia kan lantir dawn. Season tir lamah khan Daniel-a (foreigner) chungah khan kan innghat deuh, tunah erawh kan neih ṭhat chu tualchhung player-te an ni. Anni hian inrintawkna an nei, Mizo hlangin Dishant hoa khel Vikings kan hneh tawh a, tun ṭumah pawh March-a hoa khel team hi hneh leh kan duh," tiin a sawi. TKS hian Dishant-a telna Vikings chu Game 3-ah hnehin final an lut a ni.

Tuikual tan hian zan dang zawng aiin captain F. Zodinthara mawhphurhna a sang dawn a, Dina thlawp tur hian Vanchuangpuia, K. Vanlalruata, Zorinpuia Hrahsel, Lalremruata Ralte leh Lalfakmawia ten an thawhrim a ngai hle dawn a ni. Congo tlangval Nicolas Daniel-a'n TKS fans beisei a tihthlawn loh a ngai bawk ang.

Vikings an fimkhur
Season tir lama team talbuai Mission Veng Vikings kha tunah chuan champion tura rinkai team an ni leh der tawh, heti chuang hian manager H. Lalhruaitluanga a la ṭawng fimkhur hle, beiseina nei sang mah se fimkhur taka an khelh tur thu Vanglaini a hrilh.

Vikings manager Ahruaia chuan, "Result tur hi sawi lawk a harsa hle, Tuikual lam hian player an nei ṭha a, chak loh pawh pawi ti lo chunga min beih dawn avangin fimkhur taka kan inven a ngai ang," a ti. Vikings hian kum liam ta lama thil thleng an la theihnghilh lo tih a chiang.

Mission Veng hian tualchhung player ṭha leh hmuhnawm Lalrina Renthlei an nei, Tuikhuahtlang guard thlawp tur hian captain Moses Zoremmawia leh Michael F. Lalawmpuia an nei bawk. Player langsar ngah lo mah se an innghahna chu inbuatsaihna leh thawhhona ṭha a ni.

Ahruaia chuan, "March hi player ṭha a ni a, a kuta innghat vek erawh kan ni lo. Kan player dangte hian a bula an khelh hian inrintawkna an neih belh nasa em em, he hi kan ṭhat pui a ni. MSL khel tur hian inbuatsaihna kan nei ngawrhin kan thawkrim hle, tunah a rah kan hmu chho mek a ni," tiin a sawi.

Mission Veng tlangval Ahruaia hian engtik lai maha an mahni thlah­thlam ngai lotu fans chungah lawmthu a sawi a, zaninah pawh an mahni ṭawimawm leh ṭheuh tura a sawm rualin 'au dan mawi' hmanga an khingpuite au zam turin a ngen bawk.