Madrid Derby Diego Simeone a la beidawng lo

Champions League semifinal first leg-ah 3-0 ngawtin tlawm tawh mah se Atletico Madrid boss Diego Simeone a la beidawng duh lo a, Argentine manager rorum hian second leg khel tura zanin dar 12:15-a Real Madrid an mikhual hunah Zinedine Zidane-a naute hi an lehthal theih a la inbeisei thu a sawi.

Atletico Madrid boss chuan, "Kan hma lawkah game hautak zetin min hmuak a, Real Madrid lehthal hi mi ṭhenkhat tan chuan tih theih loh a ni mai thei. Mahse, kan tan erawh tih theih a ni," a ti a, Madrid Derby-ah a zawna tlawm a tum lo.

Simeone chuan sawi chhun­zawmin, "Real Madrid hi khawvela team ṭha ber pawl an nih avangin lehthal an harsat turzia chu ka hria a, mahse ka naute hnenah an tih theih thu ka hrilh. Real hi kan hneh let theih tak tak ring lo ila ka naute bulah ka sawi lo ang a, beiseina ka siam sak lo ang," tiin a team a ringtawk hle.

Zidane a fimkhur

Atletico Madrid boss Simeone a ṭawng pawr laiin Zidane erawh a ṭawng fimkhur. Real-in an ke lehlamin Champions League final an rap tawhah ngaih a ni a, La Liga-ah point hmuh zat inangin Barcelona chiah phak lo mah se vawi khata an khelh tlem zawk avangin champion thei dinhmunah an ding mek bawk - Zidane erawh a ṭawng uang duh chuang lo.

French manager chuan, "No­mawi pahnih chawi lam kan ngaihtuah lo a, ka suangtuahnaah pawh ka la ngaihtuah chhin lo. Kan tih tur chu hahdam taka awm a, ṭha taka khelh a ni," tiin match khelh tur hmabak an la neih thu a sawi a, Atletico Madrid laka chak sa khelha khelh chu 'hremna' tawh theihna a ni tih a hai lo.

Boruak a sang

Madrid Derby a nih tawh chuan boruak a sang ṭhin a, Champions League semifinal second leg a nih avangin boruak a sang lehzual dawn tih a chiang - zanin inkhel turah pawh venhimna lam hnathawktu mi 1,400 bawr vel lai Vicente Calderon-ah hian dah an ni dawn a, hei hi boruak san turzia hrilhfiahtu a ni.

Atletico Madrid tan zanin inkhel tur hi kum 1966-a Vicente Calderon-a an match hmasa ber an khelh hnua an European match hnuhnung ber tur a ni a, season tharah stadium thar an luah dawn - sulhnu tam tak an lo hnutchhiah tawhna hmun hi tlawm chunga mangṭha Atletico player-ten an duh dawn lo a, fan-ten an hrethiam lo lehzual ang. Ticket 54,000 hralh zawh vek a ni tawh a, online-in mi nuai chuangin an la chang mek bawk - Atletico in thlawptu an nei ṭha dawn tih hrilh nawn kan ngai lo.

Atletico hmelma Ronaldo

Madrid Derby-a a inlan hnu­hnung pathumah Cristiano Ronal­do-a'n goal ruk ngawt a khung thei a, Portuguese forward hi Atletico tlarhnung tan ven bik a fuh dawn - Zidane-a'n Madrid derby rilrua dah ran chungin an match hnuhnung berah Ronaldo a chawlh hahdamtir a, harsatna nei loin zaninah a inlan ang.

Real tana chanchin lawmawm tak chu hliam vanga a chawlh reng hnuah defender Raphael Varane chuan Thawhṭanni khan club training a zawm leh tawh a, chanchin lawmawm lo erawh first leg-a inhliam Dani Carvajal a la dam chiang lo - Antoine Griezmann hoin Atletico tlarhmain chhawr ṭangkai an tum dawn.