Fed Cup Club lian an dang

Barabati Stadium, Odisha-a khelh mek Federation Cup-ah Mohun Bagan leh Bengaluru FC ten Thawhṭanni khan an khingpui DSK Shivajians leh Shillong Lajong te an hneh a, Group B aṭangin club lianin semifinal an luh ngei a rinawm.

I League-a beisei pha lo Bengaluru FC-in Udanta Singh (35') leh Eugeneson Lyngdoh (46') te hmangin goal hnih an khung a, inkhel an thunun bawk. Amaherawhchu, Alberto Roca hoten goal thumna an khung mai loh avangin hun tawp lamah an talbuai.

I League top sco­rer Dipanda Dicka-a'n penalty a hlah a, mi­nute 72-naa Japanese midfielder Yuta Kinowaki goal hmangin Lajong-in beiseina an neih phah bawk. Amah­erawhchu Shillong club vanneih ni a ni lo a, Khasi defender Aiborlang Khongjee-a'n an lamah a tihluh avangin minute 85-naa Samuel Lalmuanpuia penalty khungin awmzia a nei lo. Bengaluru FC-in Lajong 3-2 in an hneh.

Mohun Bagan tan Jeje Lalpekhlua'n inkhel bul a ṭan lo a, amah aia rin Balwant Singh-a'n goal hnih (24', 71') khungin Darryl Duffy-a'n goal khat (65') a khung bawk.

Minute 73-naah Jeje a rawn lut a, injury time-ah Mizo tlangval hian goal lina rawn khungin DSK-in goal an khung ve lo. Hnahthial tlangval hian season liam ta khan Fed Cup-ah Bagan hi champion puiin goal riat a khung a, top scorer a ni.

Vawiin tlai dar 4:00 hian DSK Shivajians leh Bengaluru FC an inhma­chhawn ang a, zan dar 7:00-ah Mohun Bagan leh Shillong Lajong an in­tawng thung dawn. Inkhel hi Ten 2-ah a en theih ang.