Maria Sharapova hnehtu Bouchard

Eugenie Bouchard-i'n Madrid Open second round an khelh hmain a khingpui tur Maria Sharapova chu 'Thil dik lo ti' tiin a sawi a, court chhungah pawh Candian nula hian Russian star lakah ṭhat a chhuah lo.

Thawhṭannni zan khan Bouchard hian darkar hnih leh minute 51 an inkhelh hnuah Grand Slam vawi nga champion tawh Sharapova hi 7-5, 2-6, 6-4 in a hneh.

Thla 15 chhung hrem a nih hnua rawn kir hlim Sharapova hi a player pui ten an sawisel nasa hle a, a bik takin Stuttgart, Madrid leh Rome Open ten wildcard an pek dan an helh hlawm hle.

World number 59 Bouchard chuan, "Player ṭhenkhat ka hnenah an rawn kal a, hnehna ka chan theih nan duhsakna min hlan nasa hle. Ṭawngkam bakah message (text) hmangin fuihna thu tam tak ka dawng bawk," tiin Sharapova nen an inkhel boruak a sawi.

Inkhel dangah seeded pakhatna Angelique Kerber chuan Katerina Siniakova 6-2, 1-6, 7-5 in a hneh ve bawk. German nula Kerber hian third round a luh avang hian karleha WTA ranking chhuak thar berah chuan Serena Williams khumin pakhatna a ni leh tawh dawn a ni.