Tu nge Premier League top scorer tur?
Everton striker Romelu Lukaku-a'n tun season Premier League-ah goal 24 a khung tawh a, amah hnaih bertu Tottenham Hotspur forward Harry Kane-a'n goal thumin a pha lo. Belgian striker Lukaku hi top scorer tura rinkai a ni tawh nachungin a hnuaia awm Harry Kane, Diego Costa leh Alexis Sanchez te dah bo theih an la ni lo.
Hun kal tawh
Season liam ta khan Spurs forward Kane-a'n goal 25 khungin golden boot a dawng a, tun hnai kum nga chhunga top scorer-in goal a khung ber ṭum a ni.
Dutch striker Robin van Persie-a'n Arsenal tana a season hnuhnung berah goal 30 khungin golden boot a dawng a, Manchester Untied tana a season hmasa berah Van Persie hian goal 26 khungtin top scorer a ni leh bawk.
Tuna Premier League khel laiah top scorer vawi hnih ni thei an awm lo a, Spurs forward Kane bakah Argentine forward Sergio Aguero te chiah hi golden boot dawng tawh an awm.
English striker ropui Alan Shearer khan kum zawnin vawi thum top scorer a ni tawh a, Arsenal legend Thierry Henry chiah vawi li golden boot dawng tawh a la awm. Vawi hnih top scorer ni tawh chu Michael Owen, Jimmy Floyd Hasselbaink, Didier Drogba leh Robin van Persie te chiah an awm bawk.
Tun hun
Top scorer tura rinkai Lukaku khelhna Everton-in Watford leh Arsenal an la hmachhawn dawn a, Tottenham Hotspur-in Manchester United, Leicester City leh Hull City an la khelh dawn avangin Kane-a tan beisei tur a la awm.
Chelsea khelh hmabakah West Brom, Watford leh Sunderland te an la awm a, amaherawhchu an striker chhuanvawr Diego Costa hian tun season-ah goal hnih khung ṭum match khat chiah a la tawng a, hattrick a la siam lo - top scorer a nih theih a rinawm tawh loh.
Manchester City forward Sergio Aguero hian an match hnuhnung bera Crystal Palace 5-0 a an hneh ṭumin inhliam vangin a inlan lo. Pep Guardiola hote hian Leicester City, West Brom leh Watford an la hmachhawn dawn mah se Brazilian forward Gabriel Jesus a dam tawh avangin Argentine forward hian tun season-ah golden boot beisei ngam tawh kher lo ang.
Goal khung tamte
Hming Club Goal
Romelu Lukaku Everton 24
Harry Kane Tottenham Hotspur 21
Diego Costa Chelsea 20
Alexis Sanchez Arsenal 19
Sergio Aguero Manchester City 18
Dele Alli Tottenham Hotspur 17
Zlatan Ibrahimovic Manchester United 17
Jermain Defoe Sunderland 15
Eden Hazard Chelsea 15
Joshua King AFC Bournemouth 15
Christian Benteke Crystal Palace 14
Fernando Llorente Swansea City 13
Sadio Mané Liverpool 13
Son Heung-Min Tottenham Hotspur 12
Jamie Vardy Leicester City 12
Roberto Firmino Liverpool 11
Philippe Coutinho Liverpool 10
Troy Deeney Watford 10
Theo Walcott Arsenal 10