Blues tan pen khat bak a ngai ta lo ; Boro-in Premier League an mangṭha
Chelsea-in Premier League nomawi chawi turin vawi khat chak bak an mamawh ta lo. Antonio Conte naute hian Thawhṭanni zan khan Middlesbrough chu 3-0 in an sawp a, Boro tan Premier League an mangṭhana inkhel a ni thung - an match hnuhnung pahnihah hnehna chang pawh ni se 17-na dinhmun luah mektu Swansea City an umpha thei tawh lo.
Match thum khelh tur la nei Chelsea tan nomawi chawi turin pen khat bak pen a ngai tawh lo - Blues hian May 12 zana West Brom an lenchilh hunah hnehna an chang a nih chuan Premier League nomawi an chawi tawh ang.
Blues an ropui
Stamford Bridge-a inkhelah Chelsea an hmuhnnawm takzet a, karleh lawka an khingpui tur inkhel lai a hmuna thlirtu Baggies manager Tony Pulis-a'n ngaihtuah tur a ngahzia a takin a hmu - inkhelh ṭantir aṭangin Chelsea 'class' sang tak hmuh tur a awm nghal a, tun season-ah Premier League champion phu an awm a nih chuan anni lo liam an awm chuang lo.
Minute 23-na lekah Diego Costa-a'n goal hmahruai a khung a, Cesc Fabregas hnen aṭanga a ball hmuh ṭha tak chu Spain international striker hian player class sang a nih pholan nana a hmangin a khung. Minute 11 a liam a, goal khungtu chu Chelsea bawk an ni - Marcos Alonso chuan Middlesbrough keeper Brad Guzan kap karah an goal hnihna a pet lut a, Nemanja Matic-a'n minute 65-naa an goal hnihna a khung meuh chuan chak tur zawk a chiang tawh.
King Fabregas
Boro lakah Fabregas-a'n assist vawi hnih ngawt a siam a, Premier League chanchina season ruk chhung season tina assist vawi 10 aia tam nei tling thei hmasa ber a ni! Kum 30-a upa midfielder hi season hnih liam taa Barcelona aṭanga Jose Mourinho-a'n a leichhuah khan nomawi an chawina kawngah player pawimawh pawl a ni a, tun season-ah erawh N'Golo Kante awm avangin Antonio Conte hnuaiah beisei ang hmun a chang phak lo.
Mahse, Fabregas-a'n chance pek a nih chhunah fans leh Conte-a ti beidawng ngai lo a, Kante inhliam vanga a inlan zanah pawh a theihna la san zia hmuh turin a awm. Hei erawh thil chiang a ni - Spain international player class sang tak hian a hma lawkah Premier League nomawi thlir thei tawh mah se Stamford Bridge-a bench mawitu nih reng a duh a rinawm loh a, nipui transfer inhawn hma hauhin club lian ho chil a ti put tawh khawp ang!
Mangṭha Boro
Middlesbrough-in Premier League-a cham chhunzawm zel turin an tan tlawm a thiang tawh lo tih inhre mah se an kalkawnga ding Chelsea an ni miau a, tih theih an nei lo. Season hmasa lawka Premier League inpetkai vanga lam te khan ngui takin English football inelna sang ber an mangṭha - Norwich City, Crystal Palace leh Sunderland te nen Premier League aṭanga vawi li tla tawhin tla ngun ber an ni!
Boro hian March thla khan Premier League-a inhamtan beiseiin inhlankaipuitu an coach Aitor Karanka ban mah se manager lailawk Steve Agnew hnuaiah league match kua khelin vawi khat chiah an chak! Agnew chuan, "Chhuang taka kan sawi ṭhin Premier League club kan nihna chu mangṭha a ṭul ta. Season tluanin fan-ten min thlawp ṭah em em a, Premier League club neih an phu a ni," tiin an fan-te an phu tawk result an pe thei lo chu pawi a tih thu a sawi.
Champion phu Chelsea
Chelsea manager Conte chuan, "England-a ka season hmasa bera inelna hautak ka hmachhawn danah hian ka lawm takzet. Ka naute ka lawmpui a, vawiina an hlimna hi an phu a, league nomawi chawi hi kan phu a ni," a ti.
Conte chuan sawi chhunzawmin, "Tunah chuan nomawi chawi turin pen khat kan pen leh ta a, tuna kan tih tur chu hahdam taka awma West Brom hmachhawn tura inpeih hi a ni. Baggies kan hmachhawn hunah nomawi chawi kan tum dawn a, West Brom hian min dal tum dawn mah se kan inpeih tawh a ni," tiin a naute a ringtawk hle.