Saints mualah point mamawh Arsenal

Zanin dar 12:15 hian Pre­mier League khel turin Arsenal chu Southampton khelmual St Mary's Stadium-ah an lenglut dawn. Arsene Wenger chuan tun season-a an tih theih awmchhun chu point thum hmu zel tura hnehna chan vek a nih thu a sawi.

French manager Wenger-a'n kum 1996 aṭangin Arsenal a enkawl ṭan a, North London club a zawm aṭangin Champions League khelh loh season a nei lo. Kuminah Gunners hian beisei an phak lo hle, league match 34 an khelh aṭangin point 63 an hmu a, table-ah parukna an ni.

Beiseina

Arsenal hian league match li khelh tur an la nei a, an mahni aia match khat khel hnem zawk leh palina ni mek Manchester City an phak lohna chu point ruk a ni. An khelh hmabakah hian chak ve pawh ni tehreng se an chunga awm club an chetsual duh miau loh chuan a sang pali zingah an tan hmun a awm tawh dawn lo.

Kum 67-a upa Wenger chuan, "Kan tan chuan inkhelh hmabak palia hnehna chan vek hi kan tih theih sang ber a ni rih. Kei chuan inelna sang ber khelh ka duh, chu chu Champions League a ni," tiin a sawi. Gunners hian Saints bakah Stoke City, Sunderland leh Everton an la hmachhawn leh ang.

Arsenal hian an league match hnuhnung berah Man­chester United chu 2-0 in an hneh, he inkhelah hian goal hmahruai khungtu Granit Xhaka leh defender rinrawl Laurent Koscielny ten hliam tenau an tuar.

Wenger chuan player pahnih chungchang sawiin, "Xhaka hi chu a dinhmun a ṭha tawh, Saints a hmachhawn theih ka beisei. Koscielny erawh sawi lawk theih a ni lo, a dinhmun endik a ni leh dawn a, chumi hnuah thutlukna kan siam chauh ang," a ti.

Swiss international mid­fielder Xhaka hi a fit tawk lo palh a nih pawhin a hmun ruak luah turin Francis Coquelin a dam tawh, tlarhnungah Koscielny aia ding turin Shkodran Mustafi pawh chhawr theih a nih tawh beisei a ni.

Vawi lina

Arsenal leh Southampton te hi tun season-ah an vawi li intawna tur a ni. A hmasa berah nikum September kha khan league-ah Arsenal hian 2-1 in hnehna an chang, League Cup quarterfinal-ah erawh Saints hian 2-0 in hnehna an chang ve thung. Team pahnihte hi FA Cup round nganaah an intawng leh a - Arsenal 5-0 in an chak.

French manager Wenger chuan, "Tun season-ah Saints hian an khel ṭha tluang hle, a awmzia chu Claude Puel-a'n a hna a thawk ṭha tawk tihna a ni," tiin an khingpui tur team a fak.

Kum 2003 khan St Mary's Stadium-ah hian Robert Pires goal khat khung hmangin Arsenal hian hnehna an lo chang tawh a, hemi hnuah Saints khelmualah hian league match bikah chak ni hmel an la hmu leh miah lo a ni, an hna a awlsam dawn lo tih a chiang.

Tun season-ah Southampton hian League Cup final an lut a, mah se Manchester United lakah an vanduai. Claude Puel naute hian Premier League-ah point 42 an hmu tawh a, an tla dawn lo tih a chiang tawh - an season ṭhat ber ṭum ni lo mah se season chhia a ni lo.

Arsenal tan thu lawmawm loh chu Charlie Austin inhliam a dam. Kum 27-a upa striker hi nikum December thla hnuah a dar na vangin a la inlan leh lo, zaninah Gunners a hmachhawn theih tawh beisei a ni.