Beiseina thar nen Djokovic

Grand Slam vawi 12 champion tawh Novak Djokovic chuan a coaching team nen an thawhhona a ti tawp, team zingah hian a tennis career zawng zawng deuhthawa a thawhpui Marian Vajda pawh a tel.

Serbian tlangval hian nikum November thla khan Andy Murray lakah world number 1 nihna a chân a, kumin January thla khan Qatar Open final-ah Murray hi hnehin season bul a ṭan ṭha hle. Mahse, Qatar Open hnuah world number 2 Djokovic hian inelna hrang hrang a hmachhawnah quartefinal a la paltlang leh lo.

Kum 29-a upa Djokovic hi nikum December thla khan a coach Boris Becker nen an inṭhen tawh bawk avangin tunah chuan chona thar a hmachhawn dawn tihna a ni, tunkar chhunga khelh tur Madrid Open-ah a inlan ang.

Djokovic chuan, "Ka coaching team hi ka nuna mi pawimawh tak tak an ni a, an puihna tel lo chuan tuna ka dinhmun ang hi chu ka thleng phak lo ang. Mahse, hmasawn zel ka duh avangin tunah chuan kan inṭhen rih hi a ṭha zawkin kan hre tlang a ni," tiin a sawi.