Zonuna hmangin BCA an tho Zaninah final lut tur chingfel dawn

Hamrik hnuhnung rik nan second 24 chauh awm tawh tiha Zonunsanga point hnih hmangin Zarkawt BCA chuan Khatla TBL an nih rual a, Henry Lalramngaihawma free throw hmangin hnehna an chang zui bawk - BCA tan Mizoram Super League season thumna final khelh turin kawng a inhawng leh ta.

Thawhlehni zan khan R. Dengṭhuama Indoor Stadium-ah MSL3 semifinal Game 2 khelh a ni a, Zarkawt BCA chuan champion lai TBL 58-56 in an hneh. TBL hian Game 1-ah hnehna an chang tawh a, series 1-1 chiah a ni. Zanin dar 8:00 hian final lut tur zawn nan Game 3 khelh a ni dawn a, game hmasa pahnih a hmuhnawm tawh avangin final lut tur zawnna hi en ngei tur inkhel an tih ang chi a ni.

Second khat a hlu
BCA hi chak lo ni se MSL aṭanga mangṭha tur an ni tawh. TBL-in ṭan phat aṭangin hma an hruai nghal a, MVP nilai Vanlal­muana kut kal lai phei chuan cham­pion lai hian final an hmu phak thuak thuak. Minute 40 inkhelah TBL-in minute 39 leh second 36 hma an hruai a, BCA hmahruai hun chhung second khat chauh ni mah se Zarkawt club hi hnehna chang zawk an ni.

BCA nunna Zonuna
Zarkawt BCA-in season ṭan hmain MSL-a tawnhriat la nei lo Zonuna an lalut a, Ramthar Veng tlangval hi season hmasa berah a kawlhrawng nghal hle.

Zonuna hian inhliam vangin Game 1 a khel lo a, Game2-ah erawh point 23 neiin inkhela danglamna a ni. Ramthar Veng tlangval 'foul trouble' neih vanga bench-a a ṭhut lai chu TBL kal fawr lai ber a ni a, Zonuna inlan vawi hnihnaah Khatla club-in an dinhmun ṭha tawh sa venghim zo lo.

Guard Zonuna ang tho a quarter tina basket nei thei Dennis Lalmuanpuia (15 points) chu player ṭangkai a ni. Dawrpui Vengthar guard hian double double nei turin rebound vawi 14 a la bawk.

Kut rangkachak
Second 30 chiah a awm tawhin Zonuna'n ball a chang a, 54-56 in la hniam mah se a talbuai lo. Ramthar Veng tlangval hi a teammate-te'n a thiamna lantir theih nan hun awl an siak sak a, Zonuna hian amah bitumtu Jacob Laldinliana chu chiang zeta bumin player pathumin dan tum mah se a layup hman. TBL state pawn player Akash Deep Hazra-a'n a luh hmain ball a beng hman a, amaherawhchu ball chu a chhuk zawnga kal hman avangin 'goaltending' niin video replay nen en let hnuah BCA point hnih hi pawm a ni.

Second 24 la awmah TBL chhuanvawr H. Laldinsanga'n ball a keng a, BCA ṭantute thinphu dep depa an awm laiin TBL lam turn over an neih chhawr ṭangkaiin Henry-a'n free throw a hlawh chhuak. Game 1 tawp dawna free throw hlahtu Henry hian a hun ṭha neih a thamraltir nawn lo - free throw vawi hnih a lut ve ve.

Zarkawt BCA ṭantuten Zonuna leh Henry te kutin hlimna nasa tak a thlen avangin an kut hi kut rangkachak an tih pawhin dem theih an ni lo ang.

Mipui an sawm
BCA coach Lalruatfela chuan, "Ka nauten an khel ṭha vek a, hun pawimawhah Zonuna leh Dennis-a ten mawhphurhna an lak ngam avangin a lawmawm. Hnehna kan chan chhan tak erawh kan team thawhhona ṭhat vang bawk a ni," tiin Vanglaini a hrilh.

Mizo hlang BCA hi player naupang rual tak tak khel an ni nachungin tawnhriat nei ṭha zawk team lakah an huaisen zia an lantir thei a, tuna an mamawh chu mipui puihna ṭha a ni a, coach Afela chuan an supporter-te hun pawimawha ṭawiawm turin a ngen a, a sawm bawk.

A la tawp lo
TBL-in inhliam Garry Gill thlak nan Akash Deep Hazra an la lut a, chak pui tham niin a lang lo. Manager Lalawmpuia Pachuau chuan West Bengal tlangval feet 6 leh inches 10 zeta sang hi defence ti chak tura an lakluh a nih thu a sawi a, amaherawhchu tharum a ngah tawk loh avangin beisei a pha lo.

TBL manager P. Om-a chuan, "Quarter thumnaah kan inthlahdah deuh a, anni lamin tha an thlah ve si loh avangin a tawpah min lehthal. Kan defence chak zawk theih nan Akash kan chah lut a, Game 3-ah chuan kha ai khan a lansarh tawh zawk kan beisei," tiin Bengali player hian theihna sang zawk a neih thu a sawi.

Most valuable Player nilai Van­lalmuana leh captain Vanlal­nunsanga ten 3-point lut thei an nih zia mipui hmuhah an pholang a, an vanneih ni nise Muana point 15 neih hi chak pui tham a ni.

P. Om-a chuan beisei an la neih thu sawi zuiin, "Game 1-ah kan lehthal a, tun ṭumah min pawtthla ve thung. Kan inkhelh leh turah erawh chesual zawk nih a thiang tawh lo," tiin Vanglaini a hrilh.

Final Game 2-ah H. Laldin­sanga court chhungah an inlan tam lo a, hun tawpah a team chak pui thei dinhmunah ding mah se a chetsual vangin BCA-in hnehna an chang. TBL-in an nomawi an humhim theih nan chuan zaninah Mapuia'n a naute tan kawng a sah kuak a ngai ang.