Mizo club tan Mizo tlangval Danmawia'n Aizawl FC semifinal hruai thleng

11th May, 2017

Federation Cup-ah Aizawl FC-in match hnih khelhah point ruk hmuin semifinal lut hmasa ber an ni a, zanin dar 7:00 hian tla thei dinhmuna ding East Bengal an hmachhawn ang.

Aizawl FC-in minute 90-naa R. Laldanmawia goal khung hmangin Churchill Brothers 2-1 in an hneh a, Hmunhmelṭha tlangval Lalruatthara chu hero of the match a thlan a ni. Group A inkhel dangah East Bengal-in Robin Singh-a goal hnih hmangin Chennai City 2-0 in an hneh bawk.

A chung berah AFC

Churchill Brothers-in vawiin tlai dar 4:00 inkhela Chennai City an hneh chuan Aizawl FC kutah an hmalam hun an nghat ang. Khalid Jamil erawhin semifinal an thlen tawh avangin Cuttack khaw lumah a player chhawr rimte hahdamna hun a pe thei thung dawn a ni.

Group A-ah Tamil Nadu club Chennai City-in beisei tur an nei tawh lo a, I League champion Aizawl FC hnung zui tuma hmun ruak pakhat inchuh tur chu Goan club Churchill Brothers leh Kolkata club lian East Bengal te an ni a, Mizo club thlen chin hi a sang a ni.

Mizo tlangval

Thawhlehni zanah Mizo club tan Mizo tlangval an che ṭha a, Aizawl FC chakna chhan an ni. Minute 21-naah Lalruatthara penalty hlawhchhuah chu Lalramchullova'n goal-ah chantir a, inkhelah erawh chungnung zawk an awm lo.

Second half-ah Aizawl FC forward Kamo Bayi Stephane-a'n harsatna nei loin Churchill defender Adil Khan kap karah khungin keeper chauh hmachhawn mah se keeper Naveen Kumar-a'n Ivorian forward goal khung tur a dan sak.

Khalid-a'n minute 74-naah Brandon VL Remdika aiah H. Lalbiakthanga a luhtir a, point thum hlawh chhuak turin point khat a tawk tih a hre chiang. Amaherawhchu referee-in Mizo club leh mipui tana hriatthiam harsa tak turin thutlukna a siam a, Brandon Fernandes lakah Danmawia'n tihsual neiin lang lo mah se penalty a pe. RG Stadium-a AFC laka penalty khung tawhtu Ansumana Kromah-a'n minute 84-naah an siphurh a sut.

Mizo club-in tlawm duh lo Mizo tlangval an nei a, minute 90-naah Kawnpui tlangval BT-a ball vawrhluh chu Danmawia'n amah vengtu lak

aṭanga tal putin a tauh goal. Sialhawk tlangval Danmawia'n match zawnin chakna goal a khung a, Fed Cup neih mekah goal thum a khungna a chiah a ni bawk.

Sialhawk tlangval a 'sial'

Aizawl FC winger R. Laldanmawia'n Mizoram Premier League season hmasa bera Dinthar FC a champion puihnuah inhliam vangin beisei a pha tawk lo a, player langsar bik zingah dah tel a ni lo. MPL5-ah Sialhawk tlangval hi Chanmari West tan khel ṭha mah se I League khel tura Aizawl FC a zawm pawhin tualchhung football hrechiang inti chinah maktitu an tam hle.

I League-ah Danmawia'n goal hmangin a theihna a pholang a, East Bengal leh DSK Shivajians laka chakna goal a khung bakah Churchill Brothers an hneh ṭumin chak nemnghehna goal pawimawh tak a khung bawk. Sialhawk tlangval hi I League-ah AFC tan minute 994 a inlan a, vawi 11 starting eleven changin champion-na kawngah player pawimawh a ni.

Federation Cup-ah Danmawia hian a chet ṭhat a chhunzawm a, Mizote hriat lar Sialhawk tlangval hian India ram pum hriat turin a hming a chher mek. Aizawl FC winger Danmawia chuan, "Penalty ka chawi dan kha a dik tawk lo. Churchill player kha ka khawih fuh lo. Khami avang khan ka ṭang sawt a, goal khung châkna ka neih belh bawk. Chakna goal ka khung hi ka lawm a ni," tiin Vanglaini a hrilh.

Thlirna Tawi
May 9, Thawhlehni
Aizawl FC 2 - 1 Churchill Brothers
AFC : Lalramchullova 21' (P); R. Laldanmawia 90'
CCB : Ansumana Kromah 84'
May 9, Thawhlehni Zan
East Bengal 2 - 0 Chennai City FC
EB : Robin Singh 45+1', 76'
Zanin Inkhel Tur
4:00 PM Churchill Brothers Vs Chennai City
7:00 PM Aizawl FC Vs East Bengal
* Inkhel hi Ten 2-ah pekchhuah a ni ang.
# Team Pld W D L GF GA GD Pts
1 Aizawl FC 2 2 0 0 5 3 2 6
2 East Bengal 2 1 1 0 3 1 2 4
3 Churchill Brothers 2 0 1 1 2 3 -1 1
4 Chennai City 2 0 0 2 2 5 -3 0