Champions League final-ah Juventus

Minute 689 hnuah Juventus-in goal chhuah mah se Italian champion petchhuah nan goal khat a tawk zo lo - Thawhlehni zan khan Champions League final second leg-ah Monaco chu 2-1 in an hneh a, final an lut.

Inkhel hmasa zawkah Juventus-in 2-0 in hnehna an chang tawh a, khualmuala goal hnih khung thei club-in an mualah harsatna an tawk lo. First half-ah Mario Mandzukic leh Dani Alves hmanga goal hnih an khung avangin chawlhlawk hman hnua Kylian Mbappe goal khung chu French rawlthar hmingṭhatna belhchhahtu chauh a ni tawh a, club tan hlutna a awm tawh lo.

A hming chu Alves

Kum hnih liam taa Barcelona-in Champions League final-a Juventus ṭahna an thlen lai khan Dani Alves chu Barcelona player pawimawh a ni a, tun season-ah erawh Brazilian defender hi Italian club tan chhandamtu a ni - Monaco laka an goal khung paliah a inrawlh vek!

Monaco khelmuala an inhma­chhawn hmasak ṭuma Gonzalo Higuain goal khung pahnih siamsaktu defender hian minute 33-naah Mario Mandzukic goal khung tur a assist a, minute 44-naah an goal hnihna a khung zui - Monaco goalkeeper Danijel Subasic-a ball nam per chu

ṭha zetin a volley goal. French club-in minutee 66-naah Mbappe hmangin goal khat chhanglet mah se awmzia a nei thui lo.

Juventus kum ṭha?

Kum 1996 hnuah Juventus-in Champions League nomawi an chawi leh tawh lo a, kum 21 liam taa nomawi an chawi ṭum hian Dutch club ṭha Ajax chu penalty-ah an hneh. Mahse, Italian club hi Europe-ah an reh rei a, kum 2006 phei kha chuan match fixing vangin Serie B lamah tlak thlaktir an ni.

Mahse, Juventus-in 2015-ah Champions League final lutin team ṭha an la ni reng tih an pholang a, season thum chhunga a vawi hnih nan final an lut leh ta. Tun season Champions League-a Juve khingpui zingah Italian club laka goal khat aia tam khung an la awm lo a, fak phu an awm a nih chuan goalkeeper Gianluigi Buffon leh defensive trio Giorgio Chiellini, Leonardo Bonucci, Andrea Barzagli-te hi fak tur an ni ang.

Juve chhandamtu Allegri

Kum 2006-a Serie B-a rele­gate an nih hnu season khatah Juve-in Serie A khel lehnghal mah se an beisei nomawi erawh an chawi thei lo. Mahse, kum 2011-a Antonio Conte an lakluh hnuah harhtharna changin season thum chhung a zawnin league-ah nomawi an chawi a, Europe-ah erawh eng an ang lo - quarterfinal leh group stage chu an thlen chin a ni.

July 2014-ah Conte-a'n Italy enkawl tura Juve a chhuahsan

ṭumin, "Restaurant-ah chaw fak turin i lut a, i duhzawng ei man euro 100 a nih laia euro 10 chiah i ah si chuan tih theih i nei lo a ni," tiin transfer budget an neih tlem chu Europe-a an thlen san theih loh chhanah a sawi. Mahse, Juve-in Massimiliano Allegri an lalut a, season hnih a zawna league nomawi chawipuiin a kum thumnaah pawh nomawi chawi thei dinhmunah an la ding mek a, kum thum chhunga a vawi hnih nan Champions League final a lut leh ta - Conte thusawi dik lohna a pholang.

Beiseina nen Buffon

Khawvela goalkeeper ropui hming sawi a nih apiangin Gianluigi Buffon hming lam hmaih ni ngai lo mah se Italian keeper hian tun thlengin Cham­pions League medal chhuan tur a la nei lo a, kuminah erawh beiseina thar a nei leh ta.

Kum 2003 leh 2015 Cham­pions League final-a Juventus tana inlan keeper chuan, "Kum hnih liam taa kan tlawm khan mi tam tak chuan ka Champions League final hnuhnung ber tur niin an ngai a, mahse i beiseinaah chuan rinna i nghat tlat tur a ni," a ti a, kum 39-a upa keeper hi a phur hle.

Champion tum Allegri

Juventus manager Massimi­liano Allegri chuan, "Kan tan kum ṭha a nih ka beisei a, champion nomawi chawi turin kan dinhmun a ṭha takzet a ni. Final kan luh avangin ka naute ka lawmpui a, mahse naktuk atan kan inbuatsaih nghal a ngai. Nomawi kan la chawi lo tih hi kan hre tur a ni," a ti.

Allegri chuan sawi chhun­zawmin, "Vawiinah hian fak ka phut lo a, ka hna ka thawk mai a ni. Phur tak leh rilru hahdam tak chungin engkim ka ti a, ka hmanraw neihte a ṭha thei ang bera hman hi ka thil tum chu a ni mai," tiin Champions League final lut tura a ruahmanna a sawi.