Serpents leh Hollow chinfel zan
Thawhlehni zan khan Mizoram Super League relegation playoff game 2 khelh a ni a, over time khelh a nih hnuah Zarkawt Serpents chuan Chanmari Hollow 100-97 in an hneh. Hollow hian game 1-ah hnehna an lo chan tawh avangin game 3 khelh a ngai dawn a ni.
Vawiin tlai dar 5:00 hian a hmun ngaiah game 3 khelh a ni dawn a, a chak lo zawk tan Mizorama basketball inelna sang ber zin kawng a tawp dawn. A chak zawh hian first division-a pahnihna Dawrpui Vengthar SC nen playoff an la khelh leh ang.
R. Dengṭhuama Indoor Stadium, Mualpuia inkhelah Zarkawt Serpents hian point thumin hnehna an chang a. Serpents tan hian Jonathan Vanlalhriatpuia leh Joseph Remlalfaka ten point 16 ve ve an score a, anni pahnih bakah hian Sahil Sharma, Lalthankhuma, Lalsangkima Ralte, Kanipi Shiv Kumar leh K. Lalbiakzuala ten point 10 an score tling vek bawk.
A vawi khat nana MSL kheltu Hollow tan hian Vanlalṭhazuala chuan point 23 score-in team pahnih zinga basket nei hnem ber ni mah se a ṭhian ten an thlawp ṭha tawk lo a, chak lo zawkah an ṭang ta a ni.