Europa League United fiahna hmachhawn zan
Manchester United boss Jose Mourinho-a'n, "Tun season-a kan inkhel tur pawimawh ber a ni," tiin zanin dar 12:35-a Celta Vigo an mikhual tur chungchang a sawi a, khualmuala 1-0 a an hneh tawh club nen hian Europa League semifinal second leg an khel dawn - United tan goal chhuah loh a tawk.
Jose Mourinho-a'n Premier League aia Europa League a ngaihpawimawh tawh zawk thu a sawi a, an match hnuhnung bera Arsenal an hneh loh ṭumin a thusawi hi a takin a lantir a, a players ṭha rual a hahchawlhtir - zaninah fiahna an paltlang zo lo a nih chuan fan-ten an hrethiam lo tawp ang.
United dinhmun
Premier League-a match 25 chhung tlawm hmel an hmuh loh hnuah United-in Arsenal ngam lo mah se zaninah erawh an ṭhat dan berin an khel leh tawh dawn. Red Devils tan rei tak hliam vanga an inlan loh hnuah Phil Jones, Chris Smalling leh Juan Mata-ten Gunners hmachhawnin an dam tawh a, Ashley Young, Marcos Rojo, Luke Shaw leh Zlatan Ibrahimovic te la inhliam mah se Arsenal laka chawlh hahdamtir Eric Bailly, Daley Blind, Antonio Valencia leh Paul Pogba-te Spanish club hmachhawn turin an inpeih tawh thung.
United tan league lamah David De Gea vul mah se Europa League-a Mourinho rin zawk erawh Sergio Romero a ni a, Argentine keeper hian zaninah pawh goal a veng leh tura ngaih a ni.
19 = Rashford
United-in season tawp thleng hliam vangin Ibrahimovic chan mah se Marcus Rashford an nei a, United jersey no.19 hatu striker hian Celta nen an intawn hmasakin minute 19-naah tun season-a a goal 19-na freekick aṭangin mawi zetin a khung - Celta tlarhnung tan Old Trafford-ah ven bik a sual lo ang.
Celta Vigo tan Iago Aspas chu tlarhmaah an innghahna a ni leh dawn. Liverpool striker hlui hian Europa League-ah goal nga a khung tawh a, league-ah goal 17 khung tawhin inelna hrang hrangah goal 20 chuang a khung tawh - United hnawt chhuak turin theihna a nei tih hai rual a ni lo. Reds-a hlawhtling lo striker chuan, "United kan hneh chuan mumang thleng dik ang mai a ni dawn a, fan-te pawh beiseina nei tlat turin ka duh," a ti a, United hneh theih a inring.
Semifinal zinkawng
Manchester United-in Europa League semifinal zinkawngah an khelmual an hmang thiam takzet a, tun season-a Europa League match Old Trafford-a an khelh tawh vawi rukah vawi khatmah an la tlawm lo. Hei mai hi a ni lo, Theatre of Dreams-a an European match hnuhnung 17-ah an tlawm miah lo!
United tan an record hi Celta laka inchhuanna chi erawh a ni lo. Spanish club hian an semifinal zinkawnga khualmuala match ruk an khelhah vawi khat chiah an tlawm - match li hnehna changin vawi khat an khingpui an inhnehtawkpui a, United lakah an away record duhawm chhawm nun an tum ang.
Mourinho kam chhuak
Premier League-ah Manchester United-in pangana dinhmun luah mek mah se an chung chiaha awm Manchester City chu match thum khelh tur la awmah point liin an la phak lo a, Mourinho-a'n league-a palina nih ai chuan Europa League champion nichunga Champions League khelh a duh zawk thu vawi tam a sawi tawh.
Portuguese manager chuan, "Europa League nomawi chawi kan duh a, palina nih aiin chu chu a pawimawh zawk. Premier League aṭanga Champions League khelh hi theih loh tlukah ka ngai tawh. League-a kan dinhmun zat hi nakin thlenga an sawi tur a ni lo a, kan nomawi chawi hi a ni an la thlir tur chu. Final lut turin kan theihna zawng zawng kan pe ang," a ti a, Europe-a club inelna sang ber dawttuah final luh ngei a tum.