Saina leh Sindhu vanga lawm Gopichand

Indian Badminton team coach Pullela Gopichand chuan tun hnaiah PV Sindhu leh Saina Nehwal ten khawvela hriat an hlawh chho chu lawmawm a tih thu a sawi a, a naute hian inelna thianghlim an neih thu a sawi tel bawk.

Sindhu hian World Cham­pionship-ah bronze medal la tawhin Rio Olympic-ah silver medal a la tawh bawk a, Saina hian London Olympic-ah bronze a lak bakah world number 1 hial ni thei khawpin Super Series hoah a hlawhtling bawk - an pahnih hian Gopichand zirtir chhuah an ni.

Kum 43-a upa Gopichand chuan, "Anmahniah hmasawna a awm zel hian min ti lawm a ni. Tunah chuan khawvela shuttler langsar leh mi hriathlawh zingah an tel tawh a, mimal aia ram tih hmingṭhat duhtu an nih avangin fans an ngah a, an hma hunah pawh hlawhtlinna in a um zel ka beisei," tiin a sawi.

August thla hian World Championship khelh a ni dawn a, nakkum kumtir lamah All England Open Badminton Championship khelh a ni leh bawk ang - heng inelna lian pahnih te hi Sindhu hmathlir pawimawh an ni.

Gopichand chuan sawi chhun­zawmin, "Player zawng zawngin Olympic medal lak an duh vek, a dawtah chuan World Championship leh All England te hi a ni. Heng inelna liana pakhatna nih hi Sindhu thil tum lian leh pawimawh a ni," tiin a sawi bawk.