CAF Awards: Salah leh Mane hming a lang zel

Africa khawmualpuia football thuneitu sang ber, Confederation of African Football (CAFC) chuan Men's player of the year award dawng thei tur hming 30 an chhawpchhuah tawh aṭangin player 10 an thlang chhuak leh ta a, Mohamed Salah leh Sadio Mane hming a la tel zel.

Premier League-a Manchester City champion puitu Riyad Mahrez pawh player 10 zingah a la tel a, Chelsea goalkeeper ṭha mi Edouard Mendy leh Liverpool midfielder Naby Keita te pawh player 10 zingah an la lang phak.

Player 10 zingah hian AFCON top scorer Vincent Aboubakar, Lyon forward Karl Toko Ekambi, Paris Saint-Germain right back Achraf Hakimi, Borussia Dortmund striker thar Sebastien Haller leh Napoli centre back Kalidou Koulibaly te an lang bawk.

Salah aiah Mane?
Player 10 chhawpchhuah an nih rualin, Liverpool tana contract thar ziaktu Mohamed Salah leh thla hmasa lawka Reds aṭanga Bayern Munich zawmtu Sadio Mane te hming a langsar a, Merseyside club tana khel dun ṭhin player-ah hian tu zawkin nge award dawng ang, tih chu zawhna langsar a ni.

Season hman zawh takah khan player pahnih hian Liverpool tan FA Cup leh League Cup nomawi an chawi ve ve a, mahse, CAF award dawng tura tehna pawimawh tak, international football-ah Salah aiin Mane a hlawhtling zawk.

Mane hian Senegal chu khawmualpui inelna AFCON-ah a champion pui a, final-ah Salah telna Egypt an hneh. World Cup playoff-ah pawh team pahnih bawk hi an intawng leh a, Mane-a team ten Salah hoa khel Egypt an ngam nawnsak a, November-ah Qatar an pan dawn.

Mimal hlawhtlinna
CAF player of the year chawimawina sem hnuhnun ber, kum 2019 khan Mane thlan a ni a, Covid-19 vangin hemi hnuah hian sem chhunzawm a ni lo - season hman zawh takah khan Reds tan match 34 khelin goal 16 a khung a, assist vawi li a nei.

Mane hian club leh ram tana chet ṭhat lamah chuan Salah a khum a, mahse, mimal hlawhtlinna aṭanga teh dawn chuan Mane hian Salah a la phak lo hle.

Reds forward hian league-ah goal 23 khungin, Tottenham Hotspur striker Son Heung-min nen top scorer an ni a, Salah hi PFA Fans leh Players' player of the year-ah thlan a ni ve ve a, Football Writers' Association player of the season-ah thlan a ni bawk.

Mangṭha
CAF Men's player of the year award dawng thei tura chhawpchhuah, player 30 zingah Musa Barrow (Gambia) leh Youssouf M'Changama (Comoros) te an lo tel tawh a, hming 10 zingah erawh an tel lo.

Barcelona player thar, season hmasa Serie A-a AC Milan champion puitu, Ivorian midfielder Franck Kessie chu player 30 zingah lang mah se player 10-ah a lang phak tawh lo bawk.

Hetihlai hian AFCON tournament khata goal riat khung hmasa ber, Cameroon striker Vincent Aboubakar a la lang a, Saudi Arabia club Al-Nassr tana khel lai niin, player 10 zinga European club ni loa khel awmchhun a ni.

A thlangtu
CAF award dawng thei tura player chhawpchhuahte hi September, 2021 - June, 2022 inkara an khel dan aṭanga teh an ni a, CAF legend, technical expert leh journalist ten an thlang.

Men's player of the year chauh ni lo, category hrang hrangah award hi sem a ni dawn a, award dawng tur hi CAF technical committee, journalist, CAF hnuaia ram tin coach leh captain bakah Africa khawmualpui club inelnaa tel phak club coach leh captain ten vote hmangin an thlang ang.

CAF chuan player ṭha ber bakah hian young player leh coach of the year an thlang tel dawn a, hmeichhe player-te pualin award sem a ni dawn bawk - player of the year, Interclub player of the year, Young player of the year leh club of the year thlan a ni ve dawn bawk a ni.