Jabeur a hnungtawlh

Hmeichhe tennis thuneitu sang ber Women's Tennis Association (WTA) chuan nimin khan world ranking thar an ti chhuak. Wimbledon final hial thleng mah se Ons Jabeur chu a tlahniam, number 3 aṭangin panganaah a hnung tawlh.

Indona avangin Russia leh Belarus player ten Wimbledon an khel ve thei lo, hei vang hian ranking an chhiar thei lo. World ranking an chhiar loh avang hian season hmasa Wimbledon khel ṭha leh, kumina thleng sang deuhten an tuar niin a lang.

Season hmasa khan Jabeur-i'n Wimbledon quarterfinal a thleng a, grass court tournament liana ranking point 430 a neihsa chu a humhim thei lo, point neihsa humhim loa a hloh avangin a ranking a hniam phah ta a ni.

Wimbledon champion Elena Rybakina pawhin ranking point a hmuh belh bik chuang lo. Russia khawpui Moscow a piang, Kazakhstan hminga inlan Rybakina hi world number 23 a la ni chhunzawm zel.

A chung berah Iga Swiatek a la awm chhunzawm zel bawk. Wimbledon khelh zawh takah khan Polish nula hian beisei a phak lo, mahse season a hman ṭhat em avangin point 8336 a neih sa chu pakhatna nih chhunzawm nan a la tawk takzet.