Rodri-a'n contract thar a ziak

Manchester City midfielder Rodri chuan kum nga chhung daih contract a ziak thar. Spain international hian kum 2027 thleng Etihad Stadium-ah hun a hmang chhunzawm dawn tihna a ni a, a contract a hmang zo a nih chuan a vanglai hun City tan a hlan zo tihna a ni ang.

Kum 26 mi Rodri hian 2019 khan Atletico Madrid aṭangin Man City hi a zawm a, pound maktaduai 62.8 man niin a hunlai chuan Citizens player man to ber a ni hial, inelna hrang hrangah match 151 a khelhsak tawh.

Pep Guardiola kaihhruaina hnuaiah hmun pawimawh a chang a, midfield khaikhawmtu pawimawh bakah tlarhnung lam puitu a ni bawk - a dam a nih phawt chuan inkhel bul ṭantu zingah a tel ṭhin.

Man City midfielder Rodri chuan, "Kum 2019-a Man City ka zawm kha football ka khelh hun chhunga ka thutlukna siam fuh ber a ni. Ka ṭhiante leh manager hian hmasawn tuin min pui nasa, ni tin hian min nawr reng a ni ber.

"Ka chunga fans ṭhatna pawh hi sawi tham a tling. Anni ho nen hian hlawhtlinna tam tak kan chang tawh, he club tana player chhuanawm leh hlawhtlinna tam tak chanpuitu nih hi ka duh a ni," tiin a sawi.

Man City director of football Txiki Begiristain chuan, "Player ṭha leh puitling kan sawi dawn a nih chuan Rodri hi a ni ang, a rilru put hmang leh khawsak dan te hi entawn tlak a ni. Ani ang hi chu player tinin an enkawl châk a ni," tiin an player a fak hle.