Hamilton-a'n beisei a la nei reng

Formual 1 season chanve an hmang zo tawh a, vawi sarih champion tawh Lewis Hamilton-a'n chak ni hmel a la hmu miah lo. Mercedes car khalhtu hian kumin chhung ngeia hnehna chan theih a la beisei thu a sawi.

Kum 37 mi Hamilton chuan, "A nihna tak sawi chuan, tun season tirah kha chuan kan car hmang hian hnehna chan ka huphurh hle. Mahse, zawimuangin kan siamṭha zel a, kan ṭhat tawk lohna lai kan siam ṭha zel.

"Tunah chuan kumtir lama kan nihna nen kha chuan a danglam tawh hle. Kumin chhung ngeiin hnehna kan chan ve hman ka beisei, chutih rual erawh chuan midang hmaa thleng tur chuan tihsual nei loa chet a ngai," tiin a sawi.

Hamilton hian F1 huangah vawi 103 hnehna a chang tawh, kuminah la chak lo mah se intlansiak hnuhnung pahnihah pathumna dinhmun a luah, a tan dawhsan (podium) lawn phak hi thil lawmawm a tling.

Hma an sawn thu sawi zuiin Hamilton chuan, "Silverstone tlankawnga kan chet dan aiin Red Bull Ring-ah khan kan che ṭha tawh zawk, intlansiak lehpekah chuan a hma aiin a ṭha zual leh tawh zawk ngei ang," tiin a sawi.

July 24, Pathianni hian Circuit Paul Ricard-ah French Grand Prix an tlan leh ang.