Nottingham-in Neco Williams an lalut

Premier League kai thar Nottingham Forest chuan Liverpool defender Neco Williams chu pound maktaduai 17-in an lalut a, kum li chhung atan contract an ziahpui.

Kum 21 mi right back hian January khan Fulham chu loan-in a zawm a, Championship nomawi chawipuiin Premier League a inhlankaipui - inelna hrang hrangah match 15 khelin goal hnih a khung a, assist vawi hnih a nei bawk a ni.

Forest lamin an lo hmu tai a, nipui transfer-ah an lalut zui. Wales international chuan, "Forest hi sulhnu ropui tak nei club an ni a, City Ground hi hmun danglam bik a ni a, fan-te hmaa inkhelh ka châk tawh hle," a ti.

English club hlun hian tun nipui transfer-ah player paruk an lakluhna chiah a ni a, Neco hma hian Nigerian striker Taiwo Awoniyi, French defender Giulian Biancone, French centre back Moussa Niakhate leh Bayern Munich full back Omar Richards te chu a nghetin an lalut tawh a, Manchester United aṭangin Dean Henderson chu loan-in an la bawk.

Neco chuan, "Forest ka zawm thei hi ka lawm takzet a, Premier League-a hma an sawn zel theihna tura ka pui thei tur hi ka hlim hle.

"Coach nen kan inkawmna aṭangin hmachhawp ropui tak a awm tih ka hria a, ka team tharte zawm thuai a, chona thar hmachhawn ka châk tawh hle a ni," tiin a sawi.

Liverpool academy chhuak Neco hi defender beiseiawm tak a ni ṭhin a, mahse, amah chher liantu club-ah Trent Alexander-Arnold a awm miau avangin hmun chan a harsat.

Hetihrual hian Wales-ah erawh hmun chang phakin, kum 21 lek ni mah se ram tan vawi 20 a inlan tawh a, Euro 2020 khelhpuiin, World Cup 2022 a inpetkaipui bawk.

Liverpool tan FA Youth Cup-ah champion nomawi a lo chawi tawh a, senior team tan pawh match 33 khel tawhin goal khung lo mah se assist vawi ruk a nei.

Reds hi Premier League leh FIFA Club World Cup-ah a champion pui a, Foret tan kum naupang tê ni chunga tawnhriat nei ṭha defender lakluh theih hi a hlu.