United an bazar hleithei lo; Ten Hag hnuaia beiseina?

Nipui transfer-a Manchester United thawm neih natna ber chu Cristiano Ronaldo-a'n chhuah a duh thu chu a ni a, Manchester City leh Liverpool ten an duh ang taka squad an thuam tawha a lan laiin United erawh transfer bazar-ah an che hleithei lo.

United hian nipui transfer-ah player 13 zet an chhuah chungin pound maktaduai 13 man Tyrell Malacia an lalut tih loh chu player dang lak an la nei lo a, Erik ten Hag hnuaia indinthar tum United fans an mangang ṭan.

Red Devils player chhuah zingah Edinson Cavani, Jesse Lingard, Juan Mata, Nemanja Matic leh Paul Pogba te an tel tih ngaihtuah phei chuan United player lakluh awmchhun hi a la hrawl tawk lo.

Chutihrual chuan United hian Christian Eriksen chu a thuphungin inremna an neihpui tawh nia sawi a ni a, Barcelona midfielder Frenkie de Jong chu an lakluh ngei a rinawm bawk.

Ronaldo mawlh hi!
United-in season tharah Champions League an khel phak dawn lo a, season hmasa lawka fapa tlanbo ang maia hlim taka an lo lawm Ronaldo chuan chhuah a dil - he thu buatsaih laia amah hnaih bertu chu Chelsea an ni.

Ronaldo hian chhungkaw buaina chu chhuanlamah hmangin, United training a zawm lo phawt a, pre-season tour-a a tel theih dawn leh dawn loh a chian loh reng hnuah a zin ve ta lo bawk.

Portuguese forward hian a career tawp lamah Europa League khelh a châk lo a, hlawh tihhniam a duh lo nia sawi a ni bawk - United player-te hian Champions League an khelh phak loh chuan 25% a an hlawh tihhniam a nih theih thu contract-ah an ziak tel sa.

Mahse, United coach Erik ten Hag chuan Ronaldo hi a ruahmannaa a tel thu a sawi a, Dutch coach chuan, "Kan ruahmannaah Ronaldo a tel a, chu zawng chu a ni mai - ani nena thawhdun ka châk tawh hle," a ti.

Hello Barcelona
United hian tun nipui transfer-ah player pakhat chiah la lalut rih mah se, player thar lakluh tumin hotute erawh an buai viau a, fan-te rilru chi ai lutuk tur tih daih nan transfer news thawm na tak neih thuai an tum.

Red Devils hian tun dinhmunah chuan Dutch midfielder Frenkie de Jong lakluh chu ngaih pawimawh hmasakah an nei a, football director John Murtough leh chief executive Richard Arnold te chu Barcelona-ah an zin hial.

United hian nizan khan Bangkok khawpuiah Liverpool nen friendly match an khel a, he thu buatsaih lai hian result kan hre hman lo. Season dang ang chu ni se, United hotu pahnih Murtough leh Arnold hi a tu emaw zawk zawk pre-season tour-a kal ve tur an ni.

Mahse, an pahniha an zin hian De Jong lakluh an tumzia a pholang a, Red Devils hian Dutch midfielder an lalut thei lo a nih chuan player dang hual sa an neih thu sawi mah se De Jong lakluh ngei an duh tih a lang chiang.

Eng nge buaina?
De Jong hian kum 2019 khan Ajax aṭangin United hi pound maktaduai 86-in a zawm a, match 140-ah goal 13 khungin assist vawi 17 a nei a, 2020-21 season khan Copa del Rey nomawi a chawipui.

Dutch midfielder hian Covid-19 vangin Barca-a a season hmasa lamah a hlawh a tihniam a, hei hi Catalan club-in kum li contract a la neiha an pek leh tur a ni.

De Jong hian United a pan dawn a nih chuan Barca-in a hlawh an la pek loh hi an pek a ngai dawn tihna a ni a, suma talbuai tak Catalan club tan De Jong chhuahtir hi a hlawk lo thei.

Chu mai a ni lo - Netherlands international hian United pan a châk lo nia sawi a ni a, eng ang takin nge Red Devils nen hian an indawr zel dawn, hriat a châkawm hle.

Beiseina
United hi Ajax centre back Lisandro Martínez nen pawh sawizawm an ni a, kum 24 mi defender hi kum naupang tê ni chunga Argentina tan pawha vawi sarih inlan tawh a ni a, a ṭha tawk tih a hriat.

Season hman zawh taka Ajax player of the year-a thlan tak Martinez bakah hian Ajax tana a khelhpui tho Antony hming pawh lam rik a ni a, Brazilian winger hian season hmasa khan match 33-ah goal 12 a khung.

Ten Hag-a'n a hmanthiam sa player a zawng tih a hriat a, chutih rual chuan Ajax hian Martinez manah pound maktaduai 50 vel phutin, Anonty hi £67mtd vel tala hralh an duh niin an sawi.

Ajax sum phut zat a tam hret a, United hian £45mtd-a lakluh theih Villarreal centre back Pau Torres lo rim tawh mah se Ten Hag-a'n a hman thiam sa Martínez a duh niin an sawi a, Dutch coach hian, "Player dang chanchin ka sawi ngai lo," tiin transfer chungchang a sawi duh rih lo thung.

Ten Hag-a United
United fan-ten Ten Hag-a hnuaiah beiseina sang tak an nei a, mahse, player pakhat chiah an la lakluh avangin coach thar hnuaia an game khelh dan tur erawh sawi thiam a la harsa hle.

Red Devils coach chhuak ta pahnih Ole Gunnar Solskjaer leh Ralf Rangnick ten training-naa hun tam zawk chu coaching staff kutah an dah ṭhin a, mahse, Ten Hag hian tun dinhmunah chuan training thlengin a vil uluk hle.

Bangkok khawpuia an training-ah chuan group hnihah inṭhenin, group khat hi Mitchell van der Gaag chuan a enkawl a, group khat dang Steve McClaren-a'n kaihruaiin, Ten Hag hian group pahnih hi a kar tawn thung.

Dutch coach hi attacking football ngainatu, rilru zawng zawng nena inkhel tura player-te bisei ṭhin, inkhel thununtu nih reng duhtu a ni a, a beisei ang hi Red Devils player-teah a tuh thei ang em? Hunin a hril ang chu.