Novak Djokovic leh Grand Slam

Wimbledon title a lak hnuah Novak Djokovic chuan Grand Slam nomawi dang chawi belh leh ngei a la tum a, tun season chauh ni loin season thar lo awm tur pawh a thlir - Australian Open 2023 khelh theih ngei a inbeisei.

Serbian star hian major title 21 a nei tawh, a elpui Rafael Nadal la umphak lo deuh mah se Roger Federer chu nomawi pakhatin a khum tawh. Grand Slam champion hnem ber ni turin a tan kawng a inhawng mek.

Mahse...
Djokovic hian 2021 khan Australian Open, French Open leh Wimbledon title a la. Mahse, kuminah Australian Open a khelh theih loh bakah French Open nomawi a hloh - All England Club-ah erawh a champion leh thung.

Tun dinhmuna United States inkaihhruai danah chuan, ram dang mi an rama zin lut tur tan chuan hripui laka invenna lak a ngai. Djokovic hi vaccine la duh lotu a ni a, inkaihhruaina an siam danglam a nih loh chuan US Open 2022 a khel thei dawn lo.

US Open chauh a ni lo, season thara khelh tur Australian Open pawh kalphung an thlak a nih loh chuan a tan kawng a inhawng dawn chuang lo. Hripui hian tournament a khelh theihna hun ṭha dang a tibahlah leh mai thei.

Kum 35 mi Djokovic chuan, "Tuna thil nih phungah chuan Australia leh United States-ah ka zin lut thei lo, mahse chanchin ṭha a thlen hman ngei ka beisei. Kumin US Open atan chuan hun a tam tawh lo a ni mai thei, nakkum Australian Open atan erawh danglamna hun a la awm.

"US Open 2022 leh Australian Open 2023 ka khel thei lo a nih pawhin khawlvel tawpna tur chu a la ni lo ang, tournament dang pawh kan la hmachhawn thei zel turah beisei ang," tiin a sawi a, beiseina a la nei sang hle.

Novak an dah sang
Player ṭha leh thiam ber thlan ngawt theih a ni lo a, ranking sang leh champion hnem erawh tehna pakhat atana hman theih a ni. Tuna a lan dan chuan Djokovic hian Grand Slam nomawi chawi hnem ber turin theihna a nei, world number 1 nih rei lamah chuan record nei ṭha sa a ni.

Wimbledon final-a a hneh tak Nick Kyrgios chuan, "Novak hi chu a danglam bik em a ni, na taka ball ka pe phei a nih pawhin kan pek aia na leh ṭha zawkin min pe let zel, engtianga hmachhawn tur nge tih hi ngaihtuah thiam a harsa thei takzet.

"Player hmachhawn harsa ka tih ber erawh Federer a ni thung. Novak leh Nadal te chuan base line aṭangin an khel hnem. Roger erawhin court hi a tuam hneh em em a, che thei miah loin min nawr tawm thiam," tiin a sawi.

Kyrgios hi player theihna nei sang a ni a, a nungchang ṭha tawk lo vangin a thlen san tur angin a thleng sang tawk lo. Grand Slam final phei chu vawi khat chiah a la khel, tun ṭumah khan Nadal inhliam lo se la chuan final pawh a thleng lo mai thei bawk.

Australian tlangval Kyrgios chuan, "Grand Slam inelnaah Novak, Rafa leh Roger te i hmachhawn a nih a, set hmasa ber i la thei a nih pawhin i ngaih ti ṭha ngawt suh. Khawvela tlangsang ber Mount Everest lawn chhuah hmabak i la nei tih hria ang che," tiin player ropui pathum a dahsang thiam hle.

Pasarihna daih!
Indo buaina avangin Wimbledon 2022-ah hian Russia leh Belarus player tel phal a ni lo. Hei vang hian mipa leh hmeichhe tennis thuneitu sang Association of Tennis Professionals (ATP) leh Women's Tennis Association chuan world ranking point an chhiarsak lo.

Ranking point an chhiar loh hi a tuartu langsar chu Djokovic a ni. Nimina world ranking chhuak tharah Novak hi pasarihna a ni a, tun hnai kum li chhunga a ranking hniam lai ber a tawng hial, nomawi a chawi khan ranking point a neih loh vang a ni.

Grand Slam champion hian ranking point 2000 an hmu ṭhin, champion lai Novak tan a point neihsa hi humhim a ngai. Mahse, kuminah chuan a hloh ta zawk a, a hnunga awm player pali ngawtin an rawn khum theih phah; pathumna aṭangin a tlahniam ta hle.

French Open nomawi a hloh hnu khan Daniil Medvedev chuan Djokovic hi number 1 nihna a chhuhsak tawh. Russian tlangval hian Wimbledon khel lo mah se a hmahruaina a sawhnghet thung a, a hnungah Alexander Zverev a awm.

Nadal chuan player pakhat kal kanin pathumna dinhmun a luah. Spanish star hi hliam vangin a chawl mek, beisei anga a dam thei a nih chuan September thlaa khelh tur US Open-ah chuan inlan thei tura beisei a ni.