Wilshere-a'n hna a nei nghal

Jack Wilshere chuan football a chawlhsan aṭanga ni rei lote hnuah hna thar a nei nghal. England international hlui hian Arsenal Under-18 team a enkawl dawn, coach ni turin an lalut fel der tawh.

Kum 30 mi Wilshere hian July 8 khan inkhelh a chawlhsan, player theihna nei sang leh beiseiawm tak ni ṭhin mah se hliam vangin a buai a, a thlen san tur angin a thleng sang tawk lo, coaching lamah beiseina a nei dawn ta a ni.

Wilshere chuan, "Arsenal hi ka hmangaih tih chu sawi nawn a ngai lo, hetiang dinhmun ka chang leh thei mai hi ka lawm takzet. Gunners academy hi ka nuna hum hlimawm ka hmanna hmun a ni a, ka tan chuan hemi hmuna hna thawh leh aia thlan tur dang a awm chuang lo.

"Arsenal hian min hnungchhawn ngai lo, chhungkua kan nih avangin ṭhahnem ngai takin hna pawh ka thawk thei ang. Player naupang zawkte chher hriam hna ka thawk thei tur hi ka lawm," tiin a sawi.

North London club bakah Wilshere hian West Ham, Bolton leh Bournemouth tan pawh a khel a, a hun hnuhnung chu Danish club AGF Aarhus tan a hmang thung.