Rooney-a'n DC United enkawl dawn

Manchester United legend Wayne Rooney chuan Major League Soccer club DC United a enkawl dawn a, he thu buatsaih a nih lai hian official taka puanzarna a la awm lo.

Rooney hi MLS-ah hian a mikhual lo. DC United tan hian thla 18 zet a lo inkhel tawh a, mahse, January 2020 khan Championship club Derby County chu player-coach angin a zawm a, coaching staff zingah a tel.

November, 2020 khan Derby hian coach Phillip Cocu an ban hnuah coach lailawk atan Rooney hi an ruat a, January, 2021-ah coach nghet atan ruat zui niin, kum hnih leh a chanve chhung atan contract a ziak.

Rooney hian coaching lama insawrbing turin inkhelh a chawlhsan zui a, mahse, Derby hi sum lama an talbuai zui avangin administration-ah an awm a, sum lam inrelbawlna a fel loh avanga hrem ni bawkin, point 21 paihsak an ni.

Derby-in harsatna an tawh vanglai hian Rooney-a'n Championship club a chhuahsan duh lo a, a mimal sum pawh tam tak a seng nia sawi a ni - team 24 inelna Championship-ah 23-na an ni a, League One-ah an tla thla.

American sumdawng hausa Chris Kirchner-a'n Derby hi lei tum mah se a tlawlh zui a, lei ngat se Rooney hi a cham an ring. Mahse, Rooney-a'n contract a la nei chungin club talbuai Derby tan hna a thawk ṭha tawkah ngaiin a chhuahsan a, DC United coach a ni dawn ta.