Champhai Kanan an kal zel ; A vawi 3-na atan penalty-ah chakin Republic an hneh
Aizawl khawpui beiseina Republic Veng LC-in semifinal an thleng zo ta lo a, Mizo defender ṭha Lalchhawnkima hoa khel Champhai Kanan Vengchu penalty-ah an ngam lo.
AR Lammuala inkhelah Champhaiin R. Ramdinthara goal hnih hmangin, minute 10 chhung lekin goal hnih an khung a, hma an hruai. Mahse, Republic Vengin F. Lallawmkima leh Aron Vanlalrinchhana hmangin an chhanglet a, 2-2 in inkhel a tawp.
Ruahsur leh chhum zingin a tihbuai inkhelah extra time khelh a ṭul a, team pahnihin goal an an khung belh loh avangin penalty hmanga chak zawk zawn a ni a, 4-3 in Champhai Kanan an chak.
A goal hma
Lammuala inkhelah Champhai Kanan Vengin goal an khung hma - minute ngana lekah Republic goalkeeper RS Lallawmzuala'n ṭul loah penaltya chawi a, R. Ramdinthara'n harsatna nei loin goal-ah a chantir.
Republic-in match pawimawhah captain K .Lalnunzama leh striker tawnhriat nei ṭha F. Lalrinpuia te bench-ah an dah a, boruak sangah an player ṭha pahnih tel loin an talbuai.
Minute-10 na lekah Ramdinthara bawk a inlar - H.Lalmuankima'n chak taka ball a tlan luhpui chu Republic defender-ten an chhuhsak thei lo a, Mk-a shot hi Republic keeper Rsa'n lo dansak mah se a per lehlam chu ven loha awm Ramdina hian goal-ah a chantir.
Comeback chu
Mual ding lam sirah Ramdina a hlauhawm chhunzawm a, Republic tlarhnung a pherh a, midfield-ah ball an hloh ngun hle bawk. Republic coach-in K. Lalnunzama (Valtea) bench-a dah reng chi a ni lo tih a hria a, chawlhlawk hmain a luhtir.
Valtea luh hnuah Republic an danglam a, minute 42-naah si phurh an sut ta nge nge - C. Lalhriatpuia corner aṭanga ball kal chu F. Lallawmkima'n a lo tauh lut a, Republic an phur sawt. Chawlhlawk hman hnuah Republic-in an zia tak tak an chhuah a, inkhel an thunun - minute 72-naah box pawn aṭanga Aron Vanlalrinchhana shot chu Champhai defender-in a lo tawk fuh a, mawi takin a goal. Hun tawp thlenga goal dang a luh loh avangin extra time khelh a ni.
A tawpna chu
Republic-in goal hmasa ber an chhuah danah keeper Rs-a chu dem theih ni mah se, goal a chhuah hnuah a insiamṭha a, Champhai lam pet goal ngei tur nia lang a dang nual - fak tlak a ni.
Republic-in goal khung tumin minute 65-naah Valpuia luh tir mah se Mizoram striker hian danglamna a thlen thei lo a, C. Hriatpuia che velhmuhnawm viau mah se goal dang a hlawh chhuak thei bik lo.
A tawpah penalty hmangin a chak zawk chinfel a ṭul a, team pahnih keeper-ten penalty pet hmasa pahnih an dang ve ve - a tawpah erawh 4-3 in Champhai an vannei ta zawk a, semifi nal an lut.
Champhai Kanan hian penalty shootout hmangin Serchhip Jt VC Vaivakawn LC leh Republic hi an hneh ta a ni.