Hnahthial lakahLengpui an 'comeback'

Lammualah inkhel hmuhnawm a awm a, mipui thawm pawh ring tak a ni - nimin khan LBS Suzuki All Mizoram Inter Village Football Tournamentquarterfinal match hnih khelh a ni a, inkhel a hmuhnawm takzet.

Inkhel hmasa zawkah mipui hmuh châk Hnahthial Jt. VC leh Lengpui an inkhel a, Hnahthialin minute 54-naa Joseph Vanlalhruaia penalty
hmangin hma an hruai a, he goal hi an chakpui mai dawn niin a lang hman.

Mahse, hunpek belhah striker ṭha mi F. Lalremsanga'n penalty hmangin si phurh a sut a, extra time-ah Joe Zoherliana chuan freekick ropuik
hmangin Lengpui hma a hruaipui zui!

Minute 90 vela chak lo tura inngai hman Lengpui fans hlim takin an lam a, Hnahthialin goal dang an khung theih tawh loh avangin Lengpui an chak a, semifi nal lut hmasa ber an ni.

Team ṭha Hnahthial
Hnahthialin quarterfi nal lut turin match li an khel a, goal 26 zet khungin an lamah goal hnih chiah a lut - midfi eld-ah player ṭha bik, Aizawl FC midfielder Joseph Vanlalhruaia leh K. Lalrinfela ten bul an ṭan. Tlarhmaah Pune City leh Hyderabad reserve tana lo khel tawh Jacob Vanlalhlimpuia leh Lalrintluanga te an awm bawk a, beisei lawk ang ngeiin Jacob-a a hmuhnawm a, Joseph leh Mafela che vel
pawh hmuhnawm tak a ni.

Lengpui coach Rohmingthanga'n Hnahthial an ṭha rual tih a hai lo a, tlarhnunga beh pawi ti lo chungin a naute a rem a, tlarhmaah counter attack hmanga nawr turin striker ṭha mi F. Lalremsanga an nei tih a chiang bawk.

First half-ah goal a lut lo a, second half ṭan aṭanga minute lina lekah Remsanga'n chance duhawm a nei a, Hnahthial defender ven karah striker tlan chak leh tharum ngah hian goal ban a pet per - uiawm tak a ni.

Lengpui a fuh
Rohmingthanga game 'plan' a fuh tiin a sawi ngam - Hnahthial lamin ball chang tam mah se Lengpui zawk an hlauhawm ṭhin. Mahse, minute 54-naah inkhel thawnthu thlak danglamin a awm a, handball vangin Hnahthialin penalty an hmu.

Hnahthial tan Joseph Vanlalhruaia chuan minute 54-naah penalty hi a chhuih lut a, Lengpui an hawihai a, mahse, tha erawh an thlah lo - minute 64-naah Remsanga khung ngei tur nia lang chu Hnahthial keeper Alex B. Lalmuankima'n a dang ṭha hle.

Lengpui an hlauhawm chhunzawm a, mawi zeta ball an inpek kual hnuah Vanlalhruaitluanga'n box pawn aṭangin ṭha zetin a pet a, mahse, goal post-in Hnahthial a chhan. Inkhel a rei tawlh tawlh a, hmahruaitu Hnahthial zawk an talbuai em ni chu aw, tih tur a ni a, game pawh muan hunah a hmanhmawh zawkah an ṭang - hun pek belh minute khatnaah Lengpui an vannei ta nge nge a, Remsanga'n goal-ah a chantir.

Lengpui tan Joe
Hnahthialin chak mai tura an inngaih laiin extra time khelh a ṭul a, minute 97-naah Joe a inlar. NorthEast United tana khel Joe hian mual sir aṭangin free kick a thlawh lut a, Hnahthial keeper Alex a chesual a, a goal.

Lengpui phur vanglai takin Hnahthial tan Jeremy Laldinpuia'n chance a nei ve leh a, mahse, corner aṭanga ball kal chu goal ruak deuhthawah a tauh lut thei lo.

Kum 2006-a CYMA football-a Lengpui champion puitu, star player Rohminga chu coach ni chunga Lengpui champion pui thei dinhmunah a ding mek. Shillong Lajong midfielder hlui chuan, "Engtiklai pawhin chak hi chu kan beisei zel a, a vannei zawkah kan ṭang. 

"Hnahthial aiin chak kan duh zawk a, kan beidawn duh loh rah kan seng a ni. Kan team hmachhawn kan hrechiang a, counter attack-ah kan innghat a, kan tifuh tih kan hmu. A tawpah chuan insawithei tur zawk kan awm lo a, a vannei zawk kan tlang a ni," tiin Vanglaini a hrilh.