Farkawn hmaah Danmawia khua Sialhawk

Sialhawk boruak san vanglai a ni - Mizoram pum huap football inelnaah chuan an thlen san ber ṭum a ni a, an thlen chin apiang hi an tan chuan record thar a ni zel. R. Laldanmawia awmna khua hian Farkawn an hmachhawn dawn.

LBS Suzuki All Mizoram Inter Village Football Tournament hmawr bawk a hnai, vawiin chawhnu dar 12:30 hian Lammualah Sialhawk leh Farkawn te hian semifi nal luh an inchuh dawn, team pahnih tan an thlen chin hi mumang ram a ni.

Sialhawk captain Danmawia chuan, "Farkawn hi kan huphurh hran bik lo, player mala chhuan tur nei lo mah ila kan thawhhona ṭha leh fi tness ṭha hi kan innghahna a ni a, vawiinah pawh hei hi kan innghahna tur a ni leh ang," tiin Vanglaini a hrilh.

Aizawl FC tana I League nomawi chawi tawh Danmawia hian inelna kal laiah goal kua a khung tawh, an team tana goal khung hnem ber a ni. Ani bakah hian goal nga khung tawh striker Rotluangliana leh winger Remruatpuia te an nei bawk. Sialhawk hian tun tournament-ah hian
goal khat chiah an la chhuah, a match hmasa berah Tuikual North an hneh ṭuma goal khat an chhuah bak chu an la chhuah leh miah lo - goal 30 an khung tawh thung, tlarhma an hriamin a hnung lam an khawng ṭha.

YouTube khawvelah Sialhawk hian hriat an hlawh. 'A pui keih keih' ho ngei mai kha inkhel en turin Aizawl an rawn thleng tawh, vawiin hian Lammualah Sialhawk ṭantute an tam dawn - Farkawn tan a tlem zawk nih a fuh lo ang, khaw pahnih an inau tawk viau tura ngaih a ni.

Farkawn hi dah hniam bik a remchang dawn lo. Kolasib Jt. VC, Diakkawn hneh chungin inelna bul an ṭan. Bungtlang South VC, Darlak VC leh Thiltlang VC lakah harsatna an tawk lo, chutih rualin team khauh tak an hmachhawn lo tiin a sawi theih.

Mahse, a la tawp lo - last 16 inkhel hmuhnawm takah Farkawn hian Salem Veng an hneh! Champion tum ngam zinga mi Salem hi an bu zawl RG Stadiumah ngei an hneh thei a, tuna an thlen chin hi tih fuh palh a ni lo tih a chiang tawk; Sialhawk lakah inrintawkna an nei sang ang.