Lammualah mipui an tam dawn

Armed Veng South leh Ramhlun North ten vawiin tlai dar 3:30 hian, LBS Suzuki All Mizoram Inter Village Football Tournament quarterfi nal match hnuhnung ber an khel dawn. Aizawl veng lian pahnih inkhel en turin Lammualah mipui an pungkhawm hnem dawn.

Ramhlun North hian Mizoram mipui an barakhaih mek. An ṭhenawm Ramhlun Venglai hneh chungin inelna bul an ṭan, quarterfi nal lut tur hian goal 12 an khung tawh; goal nga an chhuah tawh thung.

Quarterfinal lut zingah Ramhlun North hi goal khung tlem ber an ni a, amaherawhchu knockout tournament a ni miau a, match hmasa lama goal khung ṭeuh khan awmzia a nei lo, inkhela hnehna channa tawk goal khung kha a tawk mai.

Ramhlun North coach Jonathan C. Lalrintluanga chuan, "Armed Veng South hi tualchhung football-ah chuan an hming a lian. Mahse, kan inbuatsaihna a ṭha a, kan khelh tawh dan thlir chuan kan huphurh bik lo, theihtawp kan chhuah dawn," tiin Vanglaini a hrilh.

Captain C. Lalchhuanawma'n a ball pet thiam a la theihnghilh lo a, midfi elder ball pet thiamin a chawm turin K. Lalrosanga an nei bawk. Rosanga hian Thenzawl West an hneh ṭumin siphurh a sut a, an hmahruaina goal a khung bawk - ani hi Armed Veng South tana ven ngun ngai bik tur a ni dawn.

Rosanga hlauhawmzia inhrilh nawn a ngai lo. Mahse, Armed Veng South hian Indian Super League club Jamshedpur defender Laldinliana Renthlei leh FC Goa tlanghnung dawltu Lalhmangaihsanga te an nei, an match hnuhnung pahnihah goal an chhuah lo tih hriat a ṭha ang.
Hrem vangin midfi elder C. Lalmuanpuia an chhawr thei dawn lo a, a hmun ruak luah tur dap fuh an tum ang. Keeper ṭha Lalṭanpuia (Ṭp-a) an neih erawh thlamuanpui tham a ni a, a tawnhriat neih chhawr an tum ngei ang.

Armed Veng S outh captain C . Ramdinmawia chuan, "Inelna level a sang tawh, team ṭha vek an nih avangin tumah kan inhlau lo a, kan inhuphurh lo tawn bawk. Fimkhur takin kan khel ang," tiin Vanglaini a hrilh a, tihsual neih tlem an tum. Hliam leh hrem vanga chhawr theih loh an nei lo a, tualchhung football inelna sanga buai lo turin player an nei ṭha tawk. Armed Veng South tan kumin hi hun ṭha ni thei tura beisei a ni, striker Lalnunsanga (Tale-a) chungah mawhphurhna a sang ang.