Mission Vengin Tuikual South an Bye Bye

Tualchhung baketball inelna sang ber Mizoram Super League season thumna final-ah a vawi khat nan Mission Veng Vikings kan hmu dawn ta. Nilaini zan khan R. Dengṭhuama Indoor Sta­dium-ah Vikings ṭan tuten season hmasa anmahni hnehtu Tuikual South an Bye Bye let a, Mission Veng an hlim.

Semifinal Game 2 inkhelah Michael F. Lalawmpuia basket hmasa ber chu Ronald March-a point 38-in zuiin, Vikings hian MSL2 semifinal-a an ngam loh TKS lakah 93-82 in hnehna an chang. Nizan inkhel Zarkawt BCA leh Khatla TBL a chak zawk nen final-ah an intawng ang.

Vikings an lian
Thih leh dam kara leng Tui­kual South-in an chak loh chuan an zinkawng a tawp dawn tih hriaiin a tir aṭangin thapui an thawh nghal a, an hna pawimawh hmasa chu match hmasa zawka point 40 score tu March-a ven a ni.

Captain F. Zodinthara'n huai­sen taka mawhphurhna lain court chhungah hruaitu a nihna a lantir. Forward Dina hian point 21 a score bakah rebound vawi li a la a, assist ṭum hnih a nei bawk.

TKS player pahnihin March hi an veng deuh chawt a, an chan loh khanah Michael F-a rawn inlarin basket a nei thei hle. BCA point guard hlui hian point 19 score-in Vikings tualchhung player zinga basket nei hnem ber a ni.

Forward K. Vanlalruata kut kal laiin Tuikual South lamin third quarter-ah beiseina an nei sang hman hle. Quarter lina chauh khelh hmabak an neih tawhin an point score chu 65-66 niin TKS hi point khat chiahin an hniam.

Hun pawimawhah American player March dan reng theih a ni lo, slam dunk contest-a pakhana hian ṭum dang angin three points nei hnem lo mah se free throw a hlawh chhuah a hlah duh lo a, double double nei turin rebound vawi 12 a lak bawk avangin hnehna an chan theih nana player langsar ber a la ni tho.

Quarter hnuhnung berah erawh Tuikual lamin an basket venhim aia point neih belh an tum lutuk an chetsual phah a, Vikings hian point 27 an neih belh laiin Tuikual lamin point 17 bak an neih belh thei lo - a tawpa an inthlauhna chu point 11 a ni.

MSV an lawm
Mission Veng Vikings mana­ger H. Lalhruaitluanga chuan, "March kha an veng uluk dawn tih kan hriat avangin player dangte kan infuih nasa a, court chhungah a rah kan hmu. TKS lam khan huaisen takin min be let a, an fakawm hle. Chutih rualin March khan player ṭha bik a nih avangin dan reng theih a ni lo," tiin Vanglaini a hrilh.

Basketball ngaina veng Mission Veng hian MSL buatsaih tawh ṭum hnihah beisei an phak lo a, kuminah pawh season tir lamah rinkai an ni phak lo. March an neih chinah Vikings hi team danglam an ni tawh a, a vawi khat nana MSL final luh hi an phu a ni.

Ahruaia chuan sawi chhun­zawmin, "Pathian zarah kumin chu tournament kan khel rei tulh tulha kan ṭha tial tial, chutih rualin kan vannei tel bawk. MSL club zingah hian fans nei ṭha ber kan nih hial ka ring a, an puihna zarah hetiang dinhmun thleng thei hi kan ni," a ti. Mission Veng tlangval hian champion rim a nam ṭan thu a sawi tel zauh bawk.

TKS an ral lo
Tuikual South-in season kal laiah hun duhawm an hmang chho a, MBBA Season Open Tour­nament leh MBBA Cup champion an ni, inelna ngaihhlut ber MSL-ah final lut zo lo mah se an tan kum ṭha tia chhiar theih a ni ang.

TKS coach KC Lalliantluanga chuan, "Kan club hi MSL hmasa ber neih hma lawk a din a ni a, tuna kan thlen chin thlir chuan a chhe loah ka ngai. Club thuneitute inpekna a nasa a, hma kan sawn theih nan an ni hian theih tawpin hma an la reng," tiin chak lo mah se hmalam an thlir reng thu a sawi.

KC-a chuan sawi chhun­zawmin, "Mizo hlanga kan khelh inelna pahnihah kan champion thei a, hei vang hian tualchhung player kan nei ṭha tih a chiang. MSL-a kan vanduai chhan chu state pawn player lakah danglamna a awm vang chauh niin ka hria," tiin Vanglaini a hrilh. TKS hian champion tumin Amjyot Singh leh Palpreet Singh Brar an lalut a, India camp-ah koh an nih leh tak si avangin an vanduai ta a ni.

Armed Veng South tlangval KC-a hian player a nih laia a khelh tawhna Vikings chu duhsakna a hlan zui a, MSL final hmuhnawm kan kan hmuh zui ngei a beisei thu a sawi tel bawk.