FIFA thar, FIFA danglam tak a ni tawh - FIFA president
FIFA Congress vawi 67-na chu nimin khan Bahrain International Exhibition & Convention Centre, Manama-ah neih a ni a, he hunah hian FIFA hnuaia inziaklut ram 211 aiawhten an chhim a ni.
FIFA president Gianni Infantino chuan, "Football aṭanga eirukna pet chhuak turin inpuihna kan mamawh a ni. Keimahni chauh chuan kan ti thei lo a, hei hi kan pawm thlap. Hemi kawngah hian min ring turin ka duh che u a, kan rintlak a ni," tiin FIFA chu a thar a ni tawh a, a danglam tawh avangin thawhpui turin member-te a sawm.
Kum 47 mi Infantino chuan, "Football lam hrechiangtu anga insawi a, pawisa tam tham tak hmu chunga dawhkan aṭanga kalphung dik loa FIFA kaltir pawisa lo leh min thunun tumtute thurawn hi kan la dawn lo," tiin a sawi a, an hming erawh a tarlang lo.
FIFA hian nikum chhung khan ukil rawih nan pound maktaduai 39 an hmang nia sawi a ni a, hemi chungchang hi sawiin Infantino chuan, "Hetiang zat pawisa kan hman avang hian hrehawm kan tihna chhanna tur a awm lo. Inthiam lo tur chu keini ni loin min hmantirtute kha an ni," tiin an thiam loh a nih loh thu a sawi.
FIFA-in sum an hloh nasat avanga 2018 World Cup sponsor tur an harsat tur chungchang pawh president Infantino chuan a sawi a, tunah erawh chuan FIFA chu a insiam ṭha a, sum pawh a ngah tawk tih sawiin, "Kan sum dinhmun hi a nghet ṭha tawk. Dawt sawi kan mamawh lo," tiin an sum dinhmun a ṭhat thu a sawi tel bawk.