Chelsea champion zan?

Antonio Conte kaih­hruai Chelsea tan Premier League nomawi chawi turin point thum bak hmuh a ngai tawh lo. Blues hian zanin dar 12:30-ah West Bromwich Albion an lenchilh dawn a, an chak a nih chuan an champion chiang tawh dawn.

Chelsea elphak ber Tottenham Hotspur chuan an match hnuhnung ber­ah West Ham si khat faiin an hneh lo, hetih­lai hian Blues chuan Middlesbrough 3-0 in an sawp thung. Spurs leh Blues inkarah point sarih a awm - match thum chiah khelh tur an nei tawh.

Italian manager Conte hi a champion a nih chuan Premier League manager ṭang tawh zingah season khatnaa league title la nghal thei palina a ni ang. Kum 47-a upa Conte hian Chelsea chu top flight title parukna tur a lakpui ngei dawn niin a lang.

Chelsea hian kum 2004-05 season khan point 95 hmuin league champion an ni a, he mi ṭuma an point hmuh zat hi an club chanchinah an la hmu ngai lo. Tun season-ah point 84 an hmu tawh a, an khelh hmabakah chak vek pawh ni se record thar chu an siam dawn lo.

Mahse, Blues point hmuh zat (84 points) hi season hmasa Leicester City point hmuh zat aiin point thumin a tam tawh zawk, a chung bera awm hi an phu hle. Chelsea hi nomawi chawi tura rinkai chu a ni tawh ngei a, chu­tihrualin West Brom lakah chak chiang sa tia sawi ngawt chi an ni bik lo.

West Brom khelmual The Hawthorns-ah hian Chelsea-in result ṭha an nei khat hle. Tun hnai bikah an lenluh hnuhnung vawi rukah ṭum khat chiah henhna an chang a, vawi li an chak lo a ni.

London club khingpui tur West Brom manager Tony Pulis chuan, "Tun season-ah chuan Chelsea hi team ngelnghet ber an ni a, a chung bera awm hi an phuin fak tlak an ni," a ti. Pulis hian an khelmuala an league match hnuhnung berah hian point hmuh theih chu an duhthusam a nih thu a sawi tel bawk, Chelsea hi awlsam taka champion tir mai an tum dawn lo tih a chiang.

Chelsea defender Gary Cahill chuan, "Kan chungah pressure a na em em a, mahse hetiang boruak sang hmachhawn tur hian tawnhriat kan nei hnem tawh. Engtik lai mahin Wesr Brom khelmuala inkhelh hi a awlsam ngai lo, zaninah erawh kan record hlui en loin nomawi kan ngaihtuah zawk ang," tiin a sawi.

Chelsea player zingah N'Golo Kante dinhmun a la chiang lo, France international hi a khel thei lo a nih pawhin midfield phuar khawm turin Cesc Fabregas leh Nemanja Matic te an la neih avangin Conte tan buaina tur a awm lo ang.

West Brom lakah Blues hian point an hloh palh a nih pawhin an match hnuhnung pa­hnihah tlachiang tawh Sunderland leh Watford an la hmachhawn leh dawn a, an elpui Spurs-in point hloh lo pawh nise an dinhmun hi a ṭha tawh hle.