Team huaisen Atletico an tho zo lo ; Juventus hmachhawn turin Real
Atletico Madrid-in minute 20 chhung lekin Real Madrid goal-ah vawi hnih pet lut mah se an beisei 'comeback' ropui erawh an lantir thei lo - Nilaini zan Champions League semifinal second leg-ah Atletico hian an mikhual Real chu 2-1 in hneh mah se inkhel hmasa zawkah 3-0 a an tlawm tawh avangin final luh an beiseina chu a thamral.
Vicente Calderon-a European match hnuhnung berah Saul Niguez leh Antoine Griezmann-ten Diego Simeone-a naute beiseina chhit nun sak mah se Real-in Isco hmanga si khat an sut avangin Atletico tan thawh leh a harsa tawh - season li chhung chu a zawnin Real hian an ṭhenawm club beiseina an tihbo sak tawh!
Atletico tak tak
Santiago Bernabeu-ah goal thum ngawt chhuaha vawi khat pawh an khung ve loh avangin Atletico lakah mipui beiseina a sang lo. Mahse, inkhelh ṭan hmain Diego Simeone-a'n an beisei a la bo loh thu a sawi a, mite tana tih theih loh nia lang chu an tan tih theih a nih thu a sawi - Argentine manager sawi ang chiahin a naute an khel a, inkhel ṭan phat aṭangin an boruak a nung hle.
Minute ngana lekah Real keeper Keylor Navas-a'n hna a nei nghal a, Koke hun ṭha neih a dan sak. Mahse, minute sarih a liam leh meuh chuan Navas a inveng seng tawh lo - Saul Niguez-a'n hmahruaina goal a tauh lut a, Fernando Torres-a'n penalty a hlawh zui. Kum 2004 hnua Real-in Champions League match minute 20 hmalamah goal hnih an chhuah lehna hmasa ber ni turin Antoine Griezmann chuan penalty hi goal-ah a chantir - Vicente Calderon a thawm chu ring tak a ni.
Danglamna Benzema
Atletico Madrid-in an beiseina chhi nung turin goal khat an la mamawh tih an hria a, theihtawp chhuahin goal dang khung tum mah se Real-in mualpho an duh lo. Karim Benzema-a'n defender pathum hual karah mawi zetin ball a lalut a, Toni Kroos tan a siamsak. German midfielder hian goal-ah shot nghalin Jan Oblak chuan lo dang per hman mah se a per lehlam hi Isco chuan minute 42-naah goal-ah a chantir.
Atletico-in an mualah goal an chhuah avangin tlang tur chuan goal thum tal an khung ngai mah se an beidawn phah lo. Mahse, substitute Kevin Gameiro-a'n chance ṭha vawi hnih ngawt second half-ah a hlah a, Atletico tan a pawi hle - goal dang a lut tawh lo a, Zinedine Zidane-a'n Champions League nomawi humhim thei hmasa ber nih tumin Cardiff khawpui lam a hawi.
Cardiff khawpuiah...
Champions League-ah Real Madrid an champion ngun ber a, vawi 11 lai chu Europe-a club thiam ber an ni tawh - kuminah an champion leh a nih chuan Champions League nomawi a zawna chawi thei hmasa ber an ni ang. June 3 zanah final khelh a ni dawn a, Millennium Stadium, Cardiff-a Real hmaa lo ding tur chu Juventus an ni.
Italian club hi kum 21 hnua Europe-a champion tum an ni thung. Kum 1998 final-ah khan club pahnih hi an lo intawng tawh a, Predrag Mijatovic goal hmangin Real-in hnehna an chang. Hetihlai hian tuna Real manager Zidane hi Juventus player niin final-a Spanish club hmachhawn zingah a tel. Zidane chuan, "Juve hi ka career-a club pawimawh em em mai a ni a, engkim min petu an nih avangin ka tan chuan anni hmachhawn hi a 'special' dawn a ni," a ti.
Eng nge an sawi?
Real Madrid manager Zinedine Zidane chuan, "Final kan luh avangin kan hlim a, kan lawm takzet a ni. Vawiina kan thlen chin hi player-te thawhrim vang liau liau a ni a, he result hlawhchhuah hi an phu takzet a ni. Inkhel ṭantir lamah talbuai mah ila chance kan la nei ve dawn tih kan hria a, minute 25 hnu lamah kha chuan game a danglam tawh a ni," tiin hma taka goal hnih an chhuah avanga an buai loh thu a sawi.
Atletico Madrid boss Diego Simeone chuan, "Kan theihna zawng zawng kan pe a, chu chu kan lo tih fo ṭhin dan pawh a ni. Champion lai kan hmachhawn a, zir tur kan neihte inzir nan kan hmang ang. Vawiinah tlawm lo mah ila petchhuah kan ni a, mah se hei hian kan hma hun zela kan ṭhanna kawngah nasa takin min pui dawn a ni. Europe-a game lian ber pawlah kan inlan thei a, nasa takin he club hi a ṭhang a, hmasawnna tur tlemte chauh kan nei tawh a ni," tiin a eng zawngin a thlir thiam hle.