Arsenal beiseina tinungtu Sanchez

Champions League khelh tum Arsenal beiseina a nung zel. Nilaini zan inkhelah Gunners chuan kum 14 chhung Premier League match bika chak ni hmel an hmuh lohna hmun Sou­thampton khelmual St Mary's Stadium-ah 2-0 in hnehna an chang.

Minute 45 chhung chu inkhel a dulin a hmuhnawm tawk lo. Second half-ah erawh Gunners tak tak kan hmu thung. Alexis Sanchez leh substitute Olivier Giroud ten goal an khung a, Saints forward Manolo Gabbiadini goal khung tur chu keeper Petr Cech-a'n a dan sak hlauh thung.

Gunners hian league match 35 an khelh aṭangin point 66 hmuin table-ah pangana an ni ta a, an chung chiaha awm Manchester City an phak lohna chu point thum niin inkhelh hmabak pathum chiah an nei tawh.

Damna Alexis

January thla aṭanga April thlatir thleng khan Arsenal hian beisei an phak lo a, player tam zawkin inrintawkna an hloh tih hai rual a ni lo. Wenger-a'n North London club a enkawl hnuah a vawi khat nan UCL a khel phak dawl lo ngei niin a lang.

Saints khelmualah Laurent Koscielny chu hliam vangin a inlan thei lo a, Shkodran Mustafi a inlan thung. French defender Koscielny tih loh chu an match hnuhnung bera Manchester United 2-0 a an hneh ṭuma player ngai vekin bul an ṭan.

Arsenal goal nawr a na tawk lo a, ṭum dang ang bawkin point an hloh leh ngei dawnin a lang. Mahse, minute 60-naah Sanchez a rawn inlar. Chile international hian Mesut Ozil hnen aṭanga a ball hmuh chu box chhungah lalutin Saints defender pahnih a bum hnuah goal a khung.

Goal hnihna luh kawngah Sanchez sawi hmaih theih a ni lo bawk, Barcelona forward hlui ball pet Aaron Ramsey tauh chu Giroud-a'n tauh chhawng lehin chiang zetin a lut. Goal dang a lut zui lo a, khualmualah Arsenal-in point thum hlu tak an hlawh chhuak.

Kum 28-a upa Sanchez hian tun season league kal mekah goal 20 a khung tawh a, Arsenal player zingah Ian Wright, Thierry Henry, Emmanuel Adebayor leh Robin van Persie te hnung zuiin seaon khat chhunga league goal 20 khung tling thei pangana a ni.

Wenger a lawm

Arsenal manager Wenger chuan, "Inkhel thunun chungin hnehna kan chang thei a, goal kan khung bakah kan chhuah loh avangin a lawmawm. Sawiselna nasa tak kan tuar chungin kan ṭanna ngaiah kan dingnghet, a tawp thlengin hetiang hian kan kal theih ka beisei," a ti.

Saints an hneh ṭuma Arsenal tana thu lawmawm loh pakhat awm chu tun hnaia khel ṭha tluang tak Alex Oxlade-Chamberlain inhliam a ni. England inter­national hi minute 30-na lekah hliam Hector Bellerin-a'n a rawn thlak, Wenger chuan tunlaia wing back atana a hman hi a hliam nat loh thu a sawi.

Puel a chiang lo?

Nikum nipui lai khan Ronald Koeman thlakin Claude Puel-a'n Southampton a enkawl ṭan a, match 50 kaihhruai tawhin heng zingah hian ṭum 19 a chak loh pui. Table laihawl team manager hmalam hun hi a chiang lo nia sawi a awm.

Season hmasa parukna ni thei team hi League Cup final luh pui mah se Manchester United a ngam lo a, FA Cup fourth round-ah Gunners 5-0 in an ngam lo bawk. League lamah point 42 hmuin 10-naah an awm chhunzawm a, Europa League an khel phak dawn lo tih a chiang tawh.

Southampton manager Puel chuan, "A chung lam club paruk zinga mi kan hmachhawn hian kan vannei ṭhin lo. Goal khung ngei tura ngaih kan hlah a, anni lamin ho teah an khung leh ṭhin si. Tun ṭumah hian a chhe berah point khat chauh tal hmuh chu kan phu hlein ka hria," tiin a sawi. Saints hian an league match hnuhnung pathumah goal khung tumin vawi 29 an pet a, vawi khat mah a hlawhtling lo.