Phu tawk anga lawm hlawh lo Rooney

Wales international hlui Robbie Savage chuan Manchester United forward Wayne Rooney chu English football-a a phu tawk anga lawm hlawh lo ber a nih thu a sawi.

Rooney hi United leh England tana goal khung tam ber ni mah se kum 31 mi forward hian tun season match 22-ah chiah inkhel bul a ṭan a, tun nipui hian khelhna hun tam zawk chan beiseiin chhuah a tum thu a sawi thawi bawk.

Savage chuan, "Man­chester United leh Eng­land tana top scorer ni chungin nasa takin an sawisel a ni. Amah hi professional dik tak a ni a, football hi a eizawnna tih a chiang a, tun hma ang thoin thutlukna a duh loh zawnga a kal a nih chuan a la ter at zel a ni," tiin Rooney chu a record leh a nungchang avang ringawt pawhin a na zawnga sawisel tur a nih loh thu a sawi.

United captain Rooney chhan chhunzawmin Savage chuan, "A kum a upa ve zel a, hemi rual chiaha khelhna hun a chan tam tawk loh avangin tun hmaa a theihna ang khan a khel thei tawh lo a ni. Eng pawh chu ni se English football-a a phu tawk anga lawm hlawh lo ber a ni," a ti.

Kum 13 liam ta khan Rooney hian pound mak­taduai 27-in Everton aṭang­in Manchester United hi August 2004 khan a zawm a, United hi Premier League-ah vawi nga, Cham­­pions League, FA Cup, League Cup vawi thum leh Club World Cup-ah a champion pui tawh a ni.

Rooney hian tun season khan United tana pet goal tam ber ni turin Bobby Charlton record a khum a, tunah hian goal 252 a khung tawh. England tan pawh Charlton-a record bawk khumin ram tana vawi 119 a khelh tawh aṭangin goal 53 a khung.

A hma lam hun chung­changa zawhna chhangin Rooney chuan, "Cham zel ka duh ang em? He club-ah hian kum 13 ka awm tawh a, chutihrualin inkhelh ka duh a ni," a ti a, chhuah a hreh lo niin a lang.

United forward hi sum tamna hmun China nen sawi zawm a la ni zel a, a club hlui Everton leh United States lamah pawh kal thei a la ni bawk.