Semifinal lut leh tla tawh la awm lo ; Bagan, Bengaluru, DSK leh Lajong
Federation Cup champion lai Mohun Bagan-in Group B-ah DSK Shivajians leh Shillong Lajong an hneh tawh chungin semifinal an la lut lo. Thangboi Singto kaihhruai Lajong-in Bengaluru leh Bagan hneh lo mah se an la tla bik lo. DSK Shivajians-in an elpui ber Blues an hneh avangin knockout stage lut turin an dinhmun a ṭha. Vawiin hi group stage tawp ni a ni a, zanin hi engkim chian hun a ni.
Barabati Stadium, Cuttack-ah Mariners-in Nilaini zan khan Shillong Lajong 3-2 in an hneh a, tlai lamah DSK Shivajians-in Bengaluru 2-0 in an hneh bawk. Vawiin tlai dar 4:00 hian DSK leh Lajong an inkhel ang a, zan dar 7:00-ah Bagan leh Bengaluru an inkhel dawn. Inkhel hi Ten 2-ah a en theih ang.
Beisei pha lo Blues
Bengaluru FC-in Barcelona assistant coach ni tawh Albert Roca an lalut a, I League nomawi an humhim lo mai ni loin palina an ni pha ṭawk. Fed Cup-a an match hmasa berah Blues hian Lajong an hneh hram a, match hnihnaah Under 22 player paruk zet starting eleven-a hmangtu DSK Shivajians an hneh lo.
Pune khaw club tan hian Juan Quero-a'n goal hnih a khung a, Real Madrid youth system chhuak hian penalty (71') leh freekick (76') hmangin goal a khung. DSK tan hian Mizo panga Ricky Lallawmawma, Sairuatkima, Jerry Mawihmingthanga, Vanlalremkima leh Lallianzuala Chhangte ten inkhel bul ṭanin an khel ṭha hle.
Chanmari FC player hlui Jerry Mawia'n India captain Sunil Chhetri a veng hneh a, penalty hi Lunglei rawlthar Lianzuala hlawhchhuah a ni. DSK tan first keeper Subrata Paul chu Aizawl FC keeper hlui Soram Porei aiah lutin, Blues-in goal zawnah vawi 11 zet pet mah se veteran keeper Subrata an paltlang thei lo.
Bengaluru lamah keeper Lalthuammawia Ralte-in bul a ṭan a, Champhai tlangval hian goal hnih luh kawngah mawh a phur lo a, penalty chawi mah se Lianzuala tih tluk bak tih theih dang a nei tawh lo. Serchhip tlangval Daniel Lalhlimpuia pawhin bul ṭanin Bengaluru a chhan thei bik lo.
Bagan an chak
Shillong Lajong-in an match hmasa berah Bengaluru 2-3 in an hneh lo a, hetiang zat bawk hian Mohun Bagan lakah an tlawm.
Inkhelh ṭan aṭanga minute thumna lekah Pritam Kotal own goal hmangin Lajong-in hma an hruai a, tlarhnung an fimkhur tawk loh vangin minute hnih hnuah Darryl Duffy-a'n Kolkata club tan a sut lehnghal.
Lajong-in Bagan thiampuipa Sony Norde an ngam lo a, Haitian forward hian freekick aṭangin minute 27-naah goal a khung bakah minute 43-naah Katsumi Yusa khung tur a siam sak bawk.
Second half-ah Mizo tlangval Jeje Lalpekhlua'n Scottish forward Darryl Duffy a rawn thlak a, Hnathial tlangvalin goal a keng tel lo. Lajong-in minute 80-naah Aizawl FC player hlui Yuta Kinowaki hmangin goal an khung leh a, amaherawhchu goal dang an khung belh theih tawh loh avangin 2-3 in an chak lo.
A ngaihnawm lai
Mohun Bagan-in point ruk an hmu tawh a, amaherawhchu an la him bik lo. DSK Shivajians-in Lajong an hneh a, champion lai Mariners-in Bengaluru FC an hneh loh bawk chuan goal difference a pawimawh dawn. Champion lai Bagan pawhin point ruk hmu tawh mah se tla thei an la ni.
Point la hmu lo Lajong-in tlai inkhela DSK an hneh chuan Pune khaw club nen point thum ve ve an hmu dawn a, Bagan-in Bengaluru an hneh leh bawk chuan point thum hmu pathum an awm ang. Shillong club tan semifinal luh theih dan a la awm tihna a ni a, Federation Cup kaltlangin I League club-te an intluk tih a lang nawn.
Thlirna Tawi
May 10, Nilaini
DSK Shivajians 2 - 0 Bengaluru FC
DSK : Juan Quero 71'(P), 76'
Mohun Bagan 3 - 2 Shillong Lajong FC
MB : Daryl Duffy 5, Sony Norde 23, Katsumi Yusa 43'
SLJ : Pritam Kotal 3' (OG); Yuta Kinowaki 80'
Zanin Inkhel Tur
4:00 PM Shillong Lajong Vs DSK Shivajians
7:00 PM Mohun Bagan Vs Bengaluru FC
* Inkhel hi Ten 2-ah pekchhuah a ni ang.
Team Dinhmun
# Team Pld W D L GF GA GD Pts
1 Mohun Bagan 2 2 0 0 7 2 5 6
2 DSK Shivajians 2 1 0 1 2 4 -2 3
3 Bengaluru FC 2 1 0 1 3 4 -1 3
4 Shillong Lajong 2 0 0 2 4 6 -2 0
Note : Point inang an awm a nih chuan head to head dah pawimawh tur a ni.