Coutinho a cham dawn - Klopp

Liverpool manager Jurgen Klopp chuan tun hnaia Barcelona pan tur anga sawi a player pawimawh Philippe Coutinho chu Anfield-ah a cham chhunzawm zel tur thu a sawi. Kum 24-a upa midfielder hian January khan Reds-ah kum nga dang cham turin contract ziak mah se Barca nena sawi zawm a nih erawh a reh phah lo.

Klopp chuan, "A contract ziah thar hun kha ngaihtuah let ve ula, tuna chhuak tur anga sawi hi chu a dik lo. Kan club neitute thusawi chu chhuak tura ka duh an nih loh chuan player chhuahtir loh a ni a, chumi awmzia chu kan squad neihsa ti chhah turin players dang kan lalut zawk dawn a ni," tiin Coutinho chhuahtir a tum hmel loh hle.

German coach chuan sawi chhunzawmin, "Squad ṭha tak kan nei a, chuhtihrual chuan players thar lakluh pawh kan la duh cheu. Kan thu lo chuan tumah an chhuak dawn lo a, chuvangin Coutinho chungchangah hi chuan hahdam takin ka awm a ni," a ti.

Coutinho hian tun season-ah Liverpool tan league match 29 khelin goal 10 a khung a, a ṭhiante khung tur vawi ruk a siamsak bawk.